Ai khublei ka NPP West Jaintia ia u Dr Kharlukhi MP Rajya Sabha

Syllad | The Rising MeghalayaJune 20, 2020

Ka National Peoples’ Party (NPP), West Jaintia Hills District kala ai khublei ia u Dr WR Kharlukhi uba la jop suk iaka shuki MP Rajya Sabha jong ka Jylla Meghalaya.

U ma Octomewot Lamin, President NPP West Jaintia Hills District bad u General Secretary NPP West Jaintia Hills u Donboklang Kharjana ha u kyrwoh ba kila phah kila pynpaw baka NPP West Jaintia District ka dap da ka jingkmen bad sngewsarong hadien ba u Dr WR Kharlukhi, uba long u State President ka party ula shah jied kum u MP Rajya Sabha ka Jylla.

Ka NPP West Jaintia Hills ka ai khublei bad kitbok kitrwiang ia u Dr WR Kharlukhi ba un ioh ka met kaba koit kaba khiah khnang ba un lah ban iasaid iaka eh ka shon ka Jylla bad u paidbah salonsar ha ka iing dorbar thawain jong ka Rajya Sabha.

Ka NPP West Jaintia ka ai khublei ruh ia u Myntri Rangbah ka Jylla, Conrad K Sangma halor ka jingtrei shitom jong u ban wanrah iaka jingiatylli ka kynhun MDA kaba iatreilang ka BJP, UDP, PDF, HSPDP, NCP bad ki MLA Independent ban pynjop donburom ia u Dr Kharlukhi.

U Dr Kharlukhi ula jop ia u kyrtong jong ka Congress Bah Kennedy Khyriem da 20 votes. Na ki 59 vote hadien ba u Adelbert Nongrum u khlem wan mih ban thep vote, 39 vote kala leit sha u Dr Kharlukhi bad u Kennedy ula ioh 19 vote bad shi vote kala shah kyntait.