Ai khublei ka synjuk waheh shnong bad nongkhaii bar ri ia ka SDO Amlarem

Syllad | The Rising MeghalayaJanuary 14, 2021

Kum ka dak ka jingsngewnguh iaka jingshakri bad lehbha iaka Amlarem Sub Division, ka Synjuk Waheh Shnong War Jaintia Amlarem ka la ai khublei kyrpang iaka Kong JU Kharpuri, SDO Civil Amlarem ryngkat ki jingai sngewbha.

Ka Kong JU Kharpuri kala shakri kum ka EAC ha Amlarem Sub Division ha u snem 2014 bad haka 17 tarik Lber (March) 2015 bad 9 tarik Risaw (October) 2017 ka la Incharge kum ka SDO Civil bad shimti lang ban long ka BDO ha Amarem Block. Haka 21 tarik Nailar 2017 haduh ka 30 tarik Risaw (October) 2019 bad ha u snem 2018 kala wan rah burom ïaka Amlarem Block lyngba ka jingïoh khusnam Award ka Block na ka sorkar pdeng lyngba ka District namar ka jingkiew bad ïaid beit ka skhim shispah sngi ne ka MNREGA. 

Ka Kong Kharpuri kala shah pynkynriah na Amlarem sha Mawkyrwat, South West Khasi Hills.

U Daniel Khongsit, President Synjuk ki Waheh Shnong War Jaintia Amlarem haka kyrwoh kaba ula phah, ula ong ka Synjuk ka pynpaw ka jingbynnud ïaka jingshah pynkynriah kam noh ka Kong Kharpuri sha kiwei pat ki jaka namar ka la leh bha shibun ïaka Amlarem Sub-Division.

Ula ong ka Kong JU Kharpuri kadei ka briew kaba sngewrit kaba jemnud bad kaba lah ban pynïadei naduh kiba rit haduh kiba heh. 

Haka jingshimti biang iaka kam kum SDO Civil Amlarem ha u 2018 bad ha une u snem ka la kitkhlieh ban pynïaid ïaka ophis Amlarem Block bad ophis Amlarem Sub Division namar ym don officer ha SDO ophis. Haka 20 tarik Risaw (October) 2019 ka sorkar kala pynkiew kyrdan ïaka kum ka ADC Incharge SDO Civil Amlarem bad ka tnad Supply hapoh ka jingpeit jong ka, ka kiew bha lada ïa nujor bad kiwei ki tnad Supply hapoh ka Jylla. 

U Bah Richard Pohlong President ka Foreign Trade Chamber of Commerce Meghalaya (FTCCM) ula ai ka jingïaroh ïaka jinglah jong ka ban pynïaid bad plie ïaka ïew Export sha Bangladesh wat lada bun ki Waheh Shnong ki sengbhalang kiba pyrshah ban plie ïew na kadaw ka khlam COVID- 19. 

Ka Kong Kharpuri ka la khot bun tylli ki jingïalang bad ki Waheh Shnong kumjuh ki sengbhalang, ki Exporter ban pynsngewthuh ïaki bad ka la lah ban pynsngewthuh ïa baroh kiba pyrshah bad ka ïew Export ka la lah ban plie haka 17 Nailar (August) 2020. 

Kumta kum ka dak ka jingsngewnguh ka seng ki nongkhaii Exporter (FTCCM) ka ai ki jingai sngewbha bad kitbok kit rwiang ba kan koit kan khiah krad bad ba in nanglah shuh shuh ban shakri ia u paidbah ha kino kino ki jaka ba ka trei.