Ai khublei ka Synjuk Waheh Shnong Ri Jaintia ba rung ka ktien Pnar haka State Anthem

Syllad | The Rising MeghalayaJanuary 17, 2025

Ka Synjuk Waheh Shnong Ri Jaintia kala ai khublei kyrpang iaka sorkar MDA-II halor ka jingshim rai ban pynkylla noh ia ka Meghalaya State Anthem da kaba kynthup lang noh iaka ktien Pnar ha ki kyntien ne lyrics.

Ka Synjuk ka ai ka jingiaroh kyrpang khamtam iaki 7 ngut ki MLA ka rilum Jaintia hapoh ka jingialam u symbud myntri rangbah ka Jylla Ma Sniawbhalang Dhar kiba la shimkhia bha halor kane ka jingthrang jingangnud jong ki nongshong shnong ka rilum Jaintia.

“Don ka kyntien kaba ong, haba leh ia kano kano ka kam ba bha, hap ban ai ka jingiaroh bad ban siew kylliang da ka jingbha”, la ong Ma Lipon bad kyntu ruh ia baroh ki paidbah nongshong shnong ka ri Jaintia ban nym sngewthuh bakla halor ka jingdawa pynrung iaka ktien Pnar, kan wanrah iaka jingpharia jaitbynriew hapdeng u Khasi bad Jaintia.

Ka Synjuk kala ai khublei kyrpang ruh iaki baroh sengbhalang bapher bapher ka rilum Jaintia bad riew paidbah kiba don kajuh ka jingangnud ryngkat ka Synjuk ban pynrung iaka ktien Pnar haka jingrwai State Anthem bad ha kajuh ka por kala kyntu ruh iaka EC jong ka JHADC ban buddien iaki dak Pnar ba la pynmih hapoh ka Gazzette jong ka Meghalaya.

Kumba kila shimkhia ban kynthup lang iaka ktien Pnar hapoh ka State Anthem, ka Synjuk kala kyntu ruh iaki 7 ngut ki MLA ka rilum Jaintia ban iakren na ka bynta ki jingeh jong ki nongshong shnong khappud na ka daw ka jingkyntur pud jong ka sorkar Assam, ban iakren ruh halor ka jingnang kiew ki kam tuh kam thiem naduh ba sdang ka jingkhang ia u dewiong khamtam ban wanrah ka roi ka par naduh ki surok, lynti synkieng, ki skul ki kolej, ka umbam umdih, ki jaka sumar kiba biang nalor kiwei kiwei ki jingmyntoi jong u paidbah.