Ai khublei u CM ia u lahduh haka Kettlebell World Championships

Syllad | The Rising MeghalayaJune 28, 2024

U Myntri ka Tnat Sports ka Jylla u Bah Shakliar Warjri u la synran ia u lahduh ha ka jingialehkai Kettlebell u Sandeep Sharma ban iakynduh ia u Myntri Rangbah ka Jylla ha ka 27 tarik mynta u bnai na ka bynta ban ialehkmen halor ka jingjop ka jong u ia ka takma Rnong ha ka “Kettlebell World Championships” ba 80 kilo kaba la long ha Poland.

Na ka liang u Myntri Rangbah u la ai khublei ia u Sharma halor ka jinglah ka jong u ban ialehkai bha bad ban wanrah ia kane ka nam ka burom da kaba ia shondur lang ruh bad u.

Kane ka jingjop ba dang shen eh jong u Sharma ka la nanglah ban pynpaw khmat shuh shuh ia u hadien ba u la ioh ban khur ia ka takma Ksiar ha ka “WKSF Kettlebell Asia Championships” kaba la long ha Mumbai ha u bnai Nohprah 2023.

Ha kane ka lympung u la lah ruh ban thaw ia ka rekod halor ka jinglah ban rah haduh 94 sien ia ka Kettlebell ba 24 kilo tang hapoh ka 10 minit kaba pyni shisha ia ka jingtbit bad ka sap ka jong u.