Ai khublei u DSO Ri Bhoi ïaki lai skul ba rah nam lahduh haka Subroto Mukherjee Cup

Syllad | The Rising MeghalayaJuly 16, 2024

U District Sports Ophisar ka Ribhoi District, Bah Bobby L Nongbet u la pynpaw ïaka jingkmen hadien ba ki lai tylli ki skul kiba la mih khmat naka District sha ka State Level Inter School Subroto Cup kaba la long dangshen ha nongbah Shillong ki la lah ban khur nam lahduh ha baroh lai tylli ki kyrdan.

Kane ka dei ka sien kaba nyngkong ba ka Ri Bhoi kan khur namjop ha baroh ki kyrdan ha ka lympung Subroto Mukherjee Cup ha kaba ka Nongjri Presbyterian Secondary School ka la ioh ban rah ia ka nam lahduh ha ka U-15 jong ki shynrang, ka Christian Higher Secondary School ha ka U-17 ha ka liang ki kynthei bad ka Myngken Christian Higher Secondary School ha ka U-17 jong ki shynrang.

Baroh lai tylli kine ki skul kila long kiba pynkhreh ban mihkhmat pat iaka Jylla sha ka National Level ka ban sa long shen ha nongbah Delhi bad Bangalore.

U Bah Bobby u la ai khublei ïa baroh ki ba la don bynta naduh ba sdang ban ban pynlong ïa kitei ki skul ban poi sha ka thong. U la ai khublei ruh ïaki principal jong kitei ki skul kiba la ïa snohkti lang bad ka ophis DSO bad khamtam ïaki khynnah kiba la treishitom ban rah ïaka nam jong ka Skul bad ka Ribhoi hi baroh kawei.

U la kyntu ïa kitei ki khynnah ïalehkai ba kin sdang noh ban pynkhreh bha pat naka bynta ka National Level naba katei ka lympung kaba heh kan sa sdang noh shen bad kin don ruh ki kynhun kiba nabar la ri kin wan ban ïa shimbynta ha katei ka Subroto. U la kitbok ruh ba kin don barabor haka met kaba shait bad kaba khlaiñ khnang ba kin ïoh ban kilan met bha hashwa ban leit ïa shim bynta sha ka National Level.