Ai khusnam kyrpang ka MCPF ia ka skul Grace Care ba kyrshan ia ki khynnah skul baduk

Syllad | The Rising MeghalayaNovember 13, 2023

Ka skul Grace Care Academy, Mawlai Nongkwar, watla ka dei ka skul kaba don tang hapoh ka klas 10, hynrei ka dei pat kawei na ki skul kaba ai jinghikai khlem da donkam ban siew ia ki khynnah kiba wan na ka longiing kiba duna ha ka liang ka ioh ka kot.

Kumta kum ka jingithuh ia kine ki kam bakhraw jong ka, ka Mawlai Constituency Progressive Forum (MCPF) ha ka sngi Nyngkong ka la pynkup burom da kaba sam khusnam sahkynmaw (Memento) ryngkat ka song jingiarap sha kane ka skul kaba don ha ka Dong Patarim, Mawlai Nongkwar.

Ha kane sngi la ia don lang u bah Wanseng Jyrwa, Working President ka MCPF, ka principal kong Maniosha Sohtun, ki nonghikai, ki khynnah skul bad kiwei kiwei.

Haba ai jingkren u bah PT Sawkmie uba long u President ka MCPF u la pyrto ia ki kam kane ka skul, kumta kum ka seng kaba khmih ia ka bha ka miat ka thain u sngewdei hok ba dei ban ithuh ia kane ka skul halor ki kam leh isynei jong ka.

Nalor kata u la pynpaw ka jingsngewnguh ia i kmie jong i Principal kong Maniosha Sohtun, ba la ai ia ka jaka bad ba la seng ia kane ka skul. U la pynpaw ruh ba kiba bun ki riew khraw ki mih na ki longiing baduk bad ban long ki briew bakhraw hap trei shitom bad hap ban mang ban bate ia ka por, lada ki ia bun kam.

Ha kane ka sngi la ioh ruh  ka jingkren na u Bah Wanseng Jyrwa bad ruh na ka nonghikai ka kong M. Nongkynrih kaba la ai ai khublei ia u bah PT Sawkmie, MLA barim  halor kane ka jingithuh jong u, uba la noh synniang ia ka skul na ka por sha ka por bad ba ka skul ka ieng kumba long mynta dei ka jingdon bynta lang jong u.