Ai khusnam u MLA ka War Jaiñtia T.10 hajar marwei ïaki samla ba pass bha

Syllad | The Rising MeghalayaSeptember 29, 2019

JOWAI: U Myntri ka tnad Pule Puthi uba dei ruh u MLA ka War Jaiñtia u Ma Lahkmen Rymbui kum shibynta ban pynshlur shuh shuh ïaki samla kiba la pass bha haka eksamin bapher bapher ula ai khusnam ïaki da ka song pisa T.10 hajar marwei bad ka certificate.

U Ma Lahkmen Rymbui ula sam ïa kane ka khusnam haka sngi Saitjain ha ka skul Mang Hai Ryum Secondary School, Amlarem.

U Ma Lahkmen Rymbai haba kren kum u kongsan ula pynshlur ïaki samla pule ban ïakhun ïaka kyrdan IAS namar ba ka jylla Meghalaya ka duna bha ki ophisar kiba pass ïa kane ka kyrdan. “Naduh u snem 2013-14 haduh mynta ym don shuh kiba pass ïa ka kyrdan IAS,” la ong u ma Lahkmen. Ula kyntu ruh ban shim kabu ïaka lad jingiarap ka sorkar ban pule IAS, kaba mynta ka sorkar ban pynshlur iaki samla pule IAS kala ïatreilang bad ka ALS ba kin ïoh ka coaching.

U Myntri ka tnad Pule haba kren shuh shuh ha kane ka jingpynkup burom ïaki samla kiba pass bha ula kitbok kitrwiang ba kin jop haka jingim pule puthi jong ki. Bad ula pynpaw ba ulong uba kloi ban ïarap ïa kino kino ki samla pule kiba shem jingeh ban bteng ïaka pule ka puthi jong ki.

U Myntri ula ong ka sorkar ba naduh u snem 2021 kan ai ei iaki kot skul sha ki khynnah naduh kyrdan Primary haduh Secondary ban pynsuk ïa ki khynnah bad khamtam ïa ki kmie ki kpa ki ba la ïaleh shitom ban pynlut pynsep ïa la ki khun ha ki jingpule. Kine ki kot ynda la kut snem ki khynnah kin pynphai biang sha skul ban ioh pyndonkam kiwei pat ki khynnah skul.

Ha kane ka jingpynkup burom ki don haduh 6 ngut ki samla pule kiba shah pynkup burom kiba kynthup ïaka samla Buiriti Pohsnem kaba wan haka 10th Position haka HSSLC (Science) Examination, u Kyrmen Hemiat Rymbui uba wan haka kyrdan kaba 14th haka SSLC Examination, u Ngamklet Nonglamin uba wan haka kyrdan kaba 6th Position haka BCA Examination, ka Daphawa Owroi Bareh  kaba wan haka 5th Position haka BSc (Clinical Nutrition and Dietetics) Examination, 2018 , u Dimarkithmu Gayang uba wan haka kyrdan kaba 5th Position haka SSLC Examination, ka Lavinia Mebalari Myrchiang kaba wan haka kyrdan kaba 7th Position in SSLC Examination.

U Ma Kolmen Pohshna President ka UDP Circle Amlarem, ula pynpaw ka jingsngewnguh ïa u MLA ka thain uba la ai haduh T.10, 000/- marwei bad ka syrnod sha ki samla kiba pass bha naduh SSLC, HSSLC bad ki kyrdan degree. Ula ai khublei ruh ïa baroh ki President Unit bad ki paidbah ka thain Amlarem bad ia u ma Lamdibok Sumer uba la jaka ban pynlong ïa kane ka prorkam ha katei ka skul.