Ai ksai u Kyrmen ban wanrah iaka Four lane ha East Jaintia Hills, iaka lynti rel pat yn shim iaka sur u paidbah

Syllad | The Rising MeghalayaDecember 19, 2023

U Myntri ka sorkar bad MLA ka Khliehriat u Bah Kyrmen Shylla ula pyntip ba u angnud jong u paidbah ban wanrah iaka surok Four Lane ha East Jaintia Hills District ka lah ban urlong namar ba ka sorkar pdeng ruh kala don ka jingthmu ban pynheh iaka surok National Highway 6.

Ia kane u Bah Kyrmen Shylla ula ong haba kren bad ki nongthoh khubor hadien ka jingialang kynmaw burom iaka sngi iap ba 83 u myllung Soso Tham ha Khliehriat. Ula ong ka sorkar kala sdang ban leit jurip bad sorjamin iaki jaka ban pynheh iaka surok, kaba baroh shi katta ki paidbah kila hap ban im hapdeng ka jingsyrtok ban iaid ban ieng haka surok NH 6 kaba jur tang ka jingtwa khyndew bad ka jingsahkut kali la haba rang ne slap.

Kumban shu iathuh, ki paidbah ha ka thain Narpuh mynta kila iakynduh jingeh bha haka leit ka wan ha kaba naduh u bnai Risaw haduh kine ki khyndiat sngi, kila mad iaka jingsahkut kali kaba khlieh la ka sngi bad kaba la neh da ki bun bun kynta namar ka jingsniew palat liam ka surok bah NH 6.

Ula ong ruh ba u don ka jingangnud ban pyniasoh ruh iaki bun tylli ki shnong haka constituency Khliehriat bad khamtam ka surok na San Shnong kata Pynthorsale, Mukha Ialong, Mutong Chamcham bad Lumshyrmit bad ki shnong ha War Jaintia. Ula pyntip ba wat u Myntri Rangbah ka Jylla ruh ulong uba kloi ban wanrah iaka jingkylla haka roi ka par.

Ha kaba iadei bad ka lynti rel ha rilum Jaintia, u Ma Kyrmen ula ong ba shen ka sorkar kan khot pynlong da ka jingialang paidbah ban pan jingmut na ki paidbah ka district halor ka sienjam ba la shim da ka sorkar ha kaba iadei bad ka jingthmu ban wanrah lynti rel hapoh ka district. Ula ong ha kane ka jingialang yn shim iaka sur u paidbah namar ba kumba long mynta ym baroh kiba kyrshan ban wan iaka lynti rel ha rilum Jaintia.