Ai madan phlang plastic bad synthetic track lem iaka Khliehriat ong ka KSU iaka sorkar MDA

Syllad | The Rising MeghalayaJune 15, 2022

Ka Khasi Students’ Union (KSU) East Jaintia Hills District Unit kala dawa na ka tnad sports ka sorkar Meghalaya Democratic Alliance (MDA) ban ai bhah lem ia u madan phlang plastic (artificial turf) bad ka synthetic track bad kiwei kiwei ki jingtei haka kam ialehkai ban myntoi ki khynnah ialehkai ka district.

“Ka Sorkar kadei bad ai bhah ia ka East Jaintia Hills District khamtam iaka Khliehriat kawei ka Artificial turf, synthetic track bad bad kiwei de ki jingdon kam kumba kiwei ki District ki ioh khnang ba ki samla ialehkai ka district kin ioh ban kilan bad pyntbit ha ka kam ialehkai,” la ong sports secretary ka KSU Shwari Ryngkhlem.

Une u samla ula ong ia kane haba kren haka jingpynkup burom ia u Fivestar Bareh u ba la ioh rah ia ka takma Rupa bad u Kisan Bareh u la ioh rah iaka Champion Belt na ka National Mixed Martial Arts Championship kaba long dangshen ha jylla Manipur haka sngi ba ar kaba la pynlong da ka KSU Jalaphet Unit.

U Shwari ula kren bynñiaw halor ka jingleh kmie nah ka sorkar MDA iaka East Jaintia Hills District kaba haduh mynta kam shym la phaikhmat ban kyntiew iaka kam ialehkai kane ka thain wat la ka don shibun ki khynnah kiba don ka sap ka phong nylla bad kiba la mihkhmat ruh iaka jylla.

“Kane ka district kam don ia kawei ruh ka madan ialehkai kaba paka naduh ka madan ialehkai football, madan athletic, madan Basketball bad kiwei kiwei,” la ong u sports secretyary ka KSU.

Ha kane ka jingpynkup burom ia kiwei ki ar ngut la iadonlang ki nongialam ka KSU East Jaintia Hills District Unit kiba kynthup ia u president Streamly N Suchen, Cherity Suja Asst. finance secretary, u Chairman Shnong ka Jalaphet Bri Sumer bad kiwei kiwei.