Ai muhor u Lat ban ai tulop 1 lak tam ïa U Chairman, Deputy Chairman bad EM ka KHADC

Syllad | The Rising MeghalayaNovember 5, 2019

JOWAI: Ka long ka khubor pynphuh mut phuh mat ia u Chairman, u Deputy Chairman bad ki Executive Members jong ka Khasi Hills Autonomous District Council (KHADC) namar ba U Lat jong ka Jylla u la ai ia ka jingmynjur jong u ban pynkiew ia ka tulop jong ki naduh 1 tarik u bnai Iaiong mynta u snem.

Kumba yn shu pynkynmaw ka Iing Dorbar Thawain jong ka KHADC ka la mynjur ban pynkiew tulop noh ia u Chairman, Deputy Chairman bad ki Executive Member da kaba wanrah ia ka Khasi Hills Autonomous District Council Chairman’s and Deputy Chairman’s and Members of the Executive Committee (Salaries and Allowances) (Eleventh Amendment) Bill, 2019 bad la mynjur ban phah sha u Lat ka jylla ha ka 25 tarik u bnai Naitung mynta u snem.

U Lat ka Jylla ula ai ia ka muhor jong u ia ka Khasi Hills Autonomous District Council Chairman’s and Deputy Chairman’s and Members of the Executive Committee (Salaries and Allowances) (Eleventh Amendment) Act, 2019 ha ka 9 tarik u bnai Risaw mynta u snem lyngba ka notification kaba don u nombar DC/L/VII/3/2010-19/13/1417.

Katkum kane ka Ain, la pynkiew tulop ia u Chairman jong ka KHADC na ka T. 38,570 shi bnai sha ka T. 1, 03, 300 shi bnai bad la pynkiew ia ka bai iing na ka T. 4500 shi bnai shaduh ka T. 19000 shi bnai.

U Deputy Chairman bad ki Executive Member jong ka KHADC mynta kin ioh T. 99, 800 shi bnai na ka T. 37, 240 shi bnai ryngkat bad ka bai iing kaba T. 17, 000 shi bnai na ka T. 3500 shi bnai.