Ai nguh ai dem ka Dorbar Niam Seiñraij Jowai ban beh sha jngai iaka khlam ka ngoh

Syllad | The Rising MeghalayaMay 18, 2021

Ka Dorbar Niam ki khun ka Seinraij Jowai da ka jingsngewkhia ia ki jingtynjuh bahap ban mad da ki khun ka Raij ka Shnong, ka ri bad ka Jaitbynriew na ka jingwan jong ka jingpang Covid-19 haka sngi ba Ar dang step phyrngap ka la shim ban pynlong ka ngooh ka dem ka duwai ka phirat ha ryngkat ka suit ka shor ha iing Langdoh iing kyntang ka Raij.

Ia kane ka nguh ka dem ka suit ka shor kat kum ka rukom dustur u longshwa manshwa la pyndep da u Dolloi kum u khlieh ka niam khlieh ka Elaka ha ryngkat ka jingiadonlang u Langdoh, ka Langdoh, ki Sangot bad ki Wasan.

Kane ka nguhblei demblei ka duwai phirat ha Kane ka step ka long kyrpang ban kyrpad kyrpon na u Trai nongbuh nongthaw, ki Lei Shnong lei Raij, ki ryngkew ki basa ba kin ai ka da ka ker, ka Khang ka kah ia ka Shnong ka Raij ka Elaka, ka ri bad ka Jaitbynriew na ka jingpang Covid-19 kaba lawan ban tynjuh ia ki nongshong Shnong ha baroh ki liang.

Ha kane ka step hadien ba la kut ka  ngooh ka dem, ka suit ka shor, u Dolloi da ka jingsngewkhia u khot bad wer ruh ia ki nongshong Shnong ka Raij ka Elaka ba kin long kiba adkar ban bud ryntih ia ki hukum ka Sorkar ha kum Kane ka por khnang ba Kane ka jingpang kan nym iohlad ban saphriang ne pur na ka jingleh bym suidniew jongngi kum ki nongshong shnong.