Ai NOC ka JHADC ban sain rnga dewiong, u MDC ka thain um don jingtip ong ka SBYWA bad ka JYF

Syllad | The Rising MeghalayaJuly 12, 2020

Ka Jaiñtia Hills Autonomous District Council (JHADC) kala ai NOC ia kawei ka kharkhana ban seng kharkhana sain rnga dewiong (coke) ha Wah Deinling, Elaka Rymbai wat hadien ba pyrshah ki nongshong shnong jong ki saw shnong bad ka seng Southern Border Youth Welfare Association (SBYWA) bad ka Jaintia Youth Federation (JYF).

Kaba phylla kalong ba halor kane ka jingai NOC ka JHADC sha kane ka kharkhana kaba la tip kum ka M/s Unique Industry Coke Factory, u MDC ka thain Bataw Lakadong u Dr Sankey Shangpung um don jingtip eiei, la ong u president ka SBYWA u S Shadap.

Kane ka kharkhana kaba la ai NOC ka JHADC ban shna ha Umdeinling ka hap ha u pud u sam ka shnong Umsatai, Deinsatlang, Ladwahwapung bad ka shnong Pynurkba jong ka Elaka Rymbai.

“Ki paidbah kila pyrshah jur ia kane ka jingai NOC ka JHADC sha kane ka kharkhana naka daw ba ki waheh shnong kila ai NOC khlem ka jingtip u paidbah,” la ong u S Shadap.

Ka SBYWA bad ka JYF kala dep ujor ia kane sha ka executive committee kaba ialam u Thombor Shiwat kum CEM, JHADC haka 24 tarik u bnai Rymphang 2020 ban pyrshah iaka jingbuh kharkhana ha katei ka shnong bad la kynthoh ruh iaki waheh shnong namar ba ki khlem pyntip ia u paidbah, phewse ka EC u ma Thombor kala khlem bishar bniah iaka jinglong jingman ka jaka kala ai NOC haka 03-03-20.

U nongialam ka JYF J Pala ula ong b aka JHADC kala leh bor bad kam shym la khot ne pynsngew paidbah halor kane ka jingai NOC sha kane ka kharkhna sain rnga dewiong, kaba dei kaba beaiñ bad iuhroit iaka hok u paidbah nongshong shnong kitei ki saw shnong.

“Ka jingwan kane ka kharkhana saiñ rnga dewiong kan ktah jur iaka koit ka khiah u briew bad kumjuh iaki jaka rep bad ki tyllong um bam um dih kine ki shnong bad ki khynnah skul ha ki skul ba don marjan kane ka kharkhana,” la ong u S Dkhar, general secretary ka shnong Umsatai.

Kine ki ar seng bad ki paidbah jong ki saw shnong kila dawa ban pyndam noh iaka NOC kane ka kharkhana bad lada ka JHADC ka leh bymsuidniew ki paidbah na ki saw shnong kila byrthen ban iakhih paidbah.