Ai NOC u Waheh Shnong Jalaphet ïaka kharkhana saiñ rnga dewiong pyrshah u paidbah

Syllad | The Rising MeghalayaJuly 8, 2019

KHLIEHRIAT: Da ki spah ngut ki paidbah kila mih ban pyrshah ïaka jingai No Objection Certificate (NOC) U Waheh Shnong Jalaphet Bri Sutnga, East Jaintia Hills sha kawei ka kharkhana saiñ rnga dewiong kaba la thmu ban seng ïaka kharkhana hapoh ka shnong kaba jaka kaba la ip kum ka Tir-rbai haka jingialang kaba long haka sngi Nyngkong.

Kane ka jingpyrshah ki paidbah kala pynbor ïaka bor shnong bad u Waheh Shnong u Ma Womly Chyrmang ban pynsangeh shuwa shipor ïaka jingshna ïa katei ka ka kharkhana tad haduh bala lah ban pynbeit ïa kane ka kam, khnang ba kam nym ktah ïaka sawdong sawkun ka mariang.

Ki nongshong shnong kila pyrshah iaka jingthmu ban shna ia kane ka karkhana na ka daw ba u Waheh Shnong u Ma Womly Chyrmang ula ai NOC sha katei ka karkhana kaba la dei trai da u Bah Shai Chyrmang bad Bah Tailing Chyrmang khlem ka jingtip jong ka Executive Committee jong ka Dorbar Shnong bad u paid nongshong shnong.

Halor ka jingpyrshah jong u paidbah ka Dorbar Shnong Jalaphet Bri Sutnga kala khot ka jingïalang paidbah kaba long haka ïing dorbar ka shnong haka jingiadonlang u paidbah nongshong shnong.

U Ma Besterwell Bareh Chairman Shnong ula ong “Ngi kyndit ban iohi iaka jingwan pynhap tiar jong katei ka kharkhana sha katei ka shnong bad haba ngi la wad bniah ngi shem ba ki tiar kidei na ka bynta ban tei iaka kharkhana saiñ rnga dewiong.”

U MDC barim u Ma Hopingstone Bareh, ula ong ba ki ieng pyrshah ia katei karkhana sain rnga dewiong namar kadei harud shnong bad kane khlem pep kan ktah iaka sawdong sawkun ka mariang ka shnong na ka tdem bad ki jakhlia ki ban pynmih ka kharkhana.

U Ma Romseh Dkhar, uba kyrshan iaka jingwan katei ka kharkhana, ula ong ba ka jingwan kane ka kharkhana kadei ka jingmyntoi iaka shnong bad bun bun ngut ki nongshong shnong kin iohkam iohjam bad ioh ki lad kamai jakpoh. Kumta ula kyntu iaka Dorbar Shnong ba kan bishar bniah bha ia kane ka kam ym ban shu pynsangeh kynsan kynsan hynrei ban wad da kiwei ki lad ki lynti kiban nym pynmong iaki paidbah nongshong shnong kiba kyrshan ia katei ka karkhana bad ruh khamtam ia ki trai jaka bad ki trai karkhana.

U Waheh Shnong u Ma Womly Chyrmang ula kubur ba ula iaid lait iaki kyndon jong ka EC shnong bad ula kular ba nangne shakhmat un iatreilang ryngkat ryngkat bad ka Shnong khamtam u paidbah nongshong shnong.

U Ma Chyrmang ula kular ba na ka bynta ka bha ka miat jong ka shong ka thaw kumjuh u paidbah nongshong shnong u kloi ban weng iaka NOC kaba ula dep ban ai sha katei ka karkhana.

Hadien ka jingiatai sani bha ka jingialang da kawei ka sur ka la shim ia ka rai ban pynsangeh shwa shipor iaka jingshna ia katei ka karkhana katba ym pat lah ban rai da kaba pynhun ia u paidbah, uba la don arliang mynta halor katei ka kharkhana.