Ai por biang ka JHTOA ïaki karkhana cement haduh 9 tarik Naiwieng ban ai bai kit bai bah thymmai

Syllad | The Rising MeghalayaNovember 2, 2021

Ka Jaintia Hills Truck Owners’ Association (JHTOA) la ai por biang ïaki karkhana haduh 9 tarik Naiwieng ban pynbeit bad ban pyntreikam ïaka dor bai kit bai bah dewbilat hadien bala khot iakren u Deputy Commissioner, East Jaintia Hills District haka sngi Nyngkong.

Ka JHTOA dangshen kala rai ban pynlong iaka jingiakhih naduh 1 tarik Naiwieng, hynrei hadien ba u DC ula khot iakren iaka synjuk ki karkhana pynmih dewbilat Jaintia Hills Cement Manufacturing Association (JHCMA) bad JHTOA la rai ban ai por iaki karkhana ban ban pynbeit iaki kynrum kynram bad ban ai iaka dor bai kit bai bah thymmai hapoh 9 tarik Naiwieng, lymkumta ka JHTOA kala shim iaka rai ba khatduh ban iaid shakhmat ban pynlong iaka jingiakhih.

U publicity secretary JHTOA, u Nehemayah Tyngkan ula ong ba ka synjuk kala pynpaw iaka jingsngewkhia halor ka jingthied trok ki karkhana dewbilat khamtam ka Star Cement da ki spah tylli ki trok kaba ktah iaka kamai kajih jong ki trai jong ki trai muluk.

Ula ong ba nakaliang u DC ula bthah iaki JHCMA ban pyntreikam iaka dor bai kit bai bah thymmai bad ban bud ryntih ia kaei kaba la rai haka jingialang ki lai liang mamla mynshem snem kynthup iaka sorkar, JHTOA bad ka JHCMA ban pyntreikam iaka dor bai kit thymmai kaba la pynhiar na ka T.9 shi ton sha ka T. 7 shi ton shi kilometre bad ban ai bhah ban kit mar 80 percent iaki trai trok trai jylla. Nalor kata ban buh iaki kudam hapoh ka jylla ha Byrnihat kaba la pynkynriah sha Assam.

U DC ula bthah iaka ka JHTOA bad ka JHCMA ban pynbeit ia kane ka kam bad un shong bishar biang ia kane ka kam ha kine ki khyndiat sngi.

Na ka liang ka JHTOA ka pynrem jur iaka jinglehbor bad nioñ bein ki cement factory iaki nongkhaïi trai ri trak muluk bad ka jingbymkohnguh ban pyntreikam iaka hukum ka sorkar. Ka JHTOA kala ong ba kan nym shongkli ban kan iakhun haduh ban da urlong ka jingdawa jong ka bad hadien ka 9 tarik kan shim iaka rai kiba tyngeh.