Ai por ka AJMRLU iaka sorkar haduh u bnai Risaw ban pynkiew iaka bai bylla sngi bad pyntreikam iaka RCW

Syllad | The Rising MeghalayaSeptember 18, 2021

Ka All Jaiñtia Muster Rolls Workers & Labour Union (AJMRW&LU) kala ai por ïaka sorkar Jylla ban pynkiew ïaka bai nongsngi jong ki bad dawa ban pyntreikam noh mardor iaka Meghalaya Regular Casual Workers Scheme 1996 (MRCW) hapoh 30 tarik u bnai Risaw bad lada ka jingdawa jong ki kam urlong, kane ka synjuk kala byrthen ban mih biang sha surok ban iakhih pyrshah ban ujor ka ïingbishar.

Ïa kane ka rai la shim haka jingïalang kaba long ha ïungwalieh ka shnong Chilliangraij Jowai haka sngi Thohdieng.

U President u Khroo Lamsalanki Pariat haka jingkren ula pynkynmaw ba naduh u snem 2018 ka AJMRW&LU ka la dawa na ka sorkar Jylla ban pynkiew ïaka bai nongsngi bad ban pyntreikam ïaka Meghalaya Regular Casual Worker Scheme 1996.

Ula ïathuh ba ka Meghalaya Regular Casual Worker Scheme 1996 kadei ka jingïarap na bynta kito ki Muster Roll kiba la trei palat ïaka 10 snem ba kidei ban ïoh ïaka Fourth Grade Post kaba lah ban long ka kam Chowkidar ne kam Peon lada thylli bad ula kynnoh ba ha rilum Jaintia, pynban ki sahep ba don haki tnad treikam sorkar bapher bapher hapoh ki ar tylli ki District ki pynduh ïaka hok jong ki Muster Roll namar ki khlem pyntreikam ïaka.

Haba ïadei bai bylla thymmai ne ka revise wages kaba ka sorkar ka pynbna naka por shaka por ula ong ba katkum ka Minimum wages Act 1951 ka la kren shai ba ïaki nongtrei bylla dei ban pynkiew ïaka nongsngi jong ki la kumno kumno arsien shisnem ka ban treikam naduh 1 tarik bnai April bad 1 tarik bnai October hynrei na ka liang ki muster roll bad ki nongtrei bylla sngi ki pynpaw ka jingkyndit namar ba la jan poi sa ka bynta kaba ar ka sorkar ka sngap man man bad kim don jingtip eiei iaka daw b aka sorkar kam pyntreikam ia kane kabai bylla thymmai.

Ka dor jong ki bam mar dih haki ïew ki hat kila nangkiew hynrei ki nongtrei bylla sngi ki mad ïaki jingeh namar ba ka bai bylla sngi jong ki ka neh kumjuh kaba la ktah bha ia baroh ki nongtrei bylla, la ong u Bah Pariat.

Ka seng ki muster roll bad nongbylla sngi ki pynpaw ka jingsngew nguh ïa u MLA ka Ribhoi u Bah Mayralborn Syiem uba don ka mynsiem na bynta ki nongtrei bylla sngi da kaba ula wanrah ïa kane ka mat hapoh ka ïing dorbar thawain ka Jylla haka dorbar synrai ban iakren ia kane ka mat.

Ha kane ka juh ka sngi ki nongtrei bylla sngi bad ki muster roll kila pynrung kyrteng ruh haka pension skim kaba kynthup iaka E – SHRAM ka skim ai jingiarap sha kiba khlad ne ki lanot aksiden haba trei ba ktah bad PM- SYM ne ka pension skim.