Ai por ka KSU bad ki nongialam shnong Narpuh 7 sngi ban maramot iaka NH6

Syllad | The Rising MeghalayaJuly 26, 2023

Ka Khasi Students’ Union (KSU) Narpuh Circle bad ki nongialam shnong hapoh ka thain Narpuh kila ai por 7 sngi ban maramot iaka surok National Highway 6 na Mynkre haduh Malidor.

Ia kane la ong u nongialam KSU Napuh Circle ma KS Suchiang hadien bala dep ai iaka shithi sha u Deputy Commissioner, East Jaintia Hills District haka sngi Balang.

Une u nongialam ka KSU ula ong ba ka NHAI kala lehbein iaki shnong kiba hap haka thain Narpuh naduh Mynkre shaduh sha Malidor la bunbun snem watla ka khrong khajna na ka toll plaza ha Lumshnong, hynrei ka phiel pat ban shna ne maramot iaka surok kaba la dap sa ki thliew ki syar bad ki pung um kaba wanrah jingeh iaka leit ka wan u paidbah.

Ula ong ruh ba kim lah shuh ban niew iaka National Highway namar ba kam pher shuh iaka surok khyndew. Ka iaid ka ieng ki paidbah khamtam haba kit ia ki briew kiba pang shitom kaba jingeh ban iaid lyngba kane ka surok.

Kumta haba kyrpad ia u DC, ka KSU bad ka Nongialam shnong Narpuh kila dawa ba ka NHAI bad ki bor ba dep peit iaka surok ki dei ban pynthikna ban shna iaka surok na Mynkre sha Malidor dei ban pyndep hapoh 7 sngi. Lada phiel ban pyndep iaka jingmaramot hapoh ka 7 sngi bala buh iaka shithi kin shim da kiwei ki sienjam da kaba khang iaka toll plaza bad ban mudui da ka ejahar pyrshah iaka NHAI.

Lah ban pynkynmaw ba kane ka jingpheil ka NHAI ban pynbha iaka surok kala poi shaduh sha iingbishar Meghalaya High Court, pynban ka NHAI haduh mynta mynne kala phiel ban shna iaka surok.