Ai por ka Seng UHM shitaiew ia u CEM ban khynra laisen bar jylla

Syllad | The Rising MeghalayaAugust 7, 2023

Ka Seng United Hynniewtrep Movement, East Jaintia Hills District ka la ai por shitaiew ia u Chief Executive Member (CEM) ka JHADC ban pynlong ka jingkhynra trading license bad labour license pyrshah ia ki bar jylla hapoh East Jaintia Hills, lym kumta ka Seng kan shim hi ia ki sienjam ban pynlong ka jingkhynra.

Kane ka la wan long ruh hadien ba ka Seng UHM-EJH ka la leit ban aiti ia ka dorkhas sha u Chief Executive Member (CEM) ka Jaintia Hills Autonomous District Council (JHADC) da kaba buh ka jingkyrpad na ka bynta ban pynlong ka jingkhynra trading license bad labour license pyrshah ia ki bar jylla hapoh ka district.

Ka Seng UHM-EJHD ha u kyrwoh lyngba u President, u Ma Brosenly Siangshai ka pynpaw ka jingsngewkhia kaba jur ha kaba iadei bad ki kam khaii beain jong ki bar jylla kumjuh ki nongwan bylla ki bym don satia ia ki kot ki sla kiba biang ban leh ia ki kam khaii pateng bad ban trei ban ktah hapoh ka district.

Na ka liang ka Seng ka la ong ruh ba kine ki bar jylla ki la shu wan khaii bad wan trei laitluid hapoh kane ka district khlem da khein snep ne burom ia ka District Council kaba dei khmih halor kane ka bynta.

Kumta  ka Seng ka kyntu jur ia ka ophis jong u CEM ka JHADC lyngba ka tnat khaii pateng (Trade) ba dei ban pynlong da ka jingkhynra pyrshah ia kine ki bar jylla kiba wan ban knieh ia ka pliang ja jong ki trai ri trai muluk lyngba ki jingleh ia ki kam khaii pateng bad wad trei wan ktah beain hapoh ka district.