Ai por ki nonghikai SSA ia ka Sorkar haduh ka 30 tarik Nailur ban pynkiew tulop

Syllad | The Rising MeghalayaSeptember 13, 2024

Ka All Meghalaya SSA School Teachers’ Association (AMSSASTA) bad ka All Garo Hills SSA School Teachers’ Association (AGHSSASTA) haka 12 tarik Nailur ki la ai por ia ka Sorkar Jylla haduh ka 30 tarik ba kan ai ia ka jingmynjur na ka bynta ka jingpynkiew ia ka tulop jong ki nonghikai SSA ha ka Jylla.

Kine ki nonghikai SSA ki la maham ruh ba lada ka Sorkar kam lah ban pynurlong ia kane ka jingdawa ka jong ki katkum ka por ba ka la buh kam banse ban pynlong da ka jingiakhih kaba khlem buh por ha baroh kawei ka Jylla.

Ha a shithi sha u Myntri Rangbah ka jylla u Conrad K Sangma, u President ka AMSSASTA Bah Peter Thyrniang bad u President ka AGHSSASTA u Labingstone G Momin ki la ong, “Haduh mynta ngim pat shym la ioh ia kano kano ka jubab na ka sorkar halor kane ka phang kaba kongsan kaba la iaid mynta lah phra snem, kata naduh ba ka sorkar ka la pynkiew khatduh eh ia ka tulop jong ki nonghikai SSA. Kumba baroh ngi ka tip bha halor ka jingkiew dor jong ki mar ki mata kumba ka long mynta, kumta ngi dawa jur ba dei ban pynkiew noh mardor ia ka tulop ka ban ym duna ia ka 100 percent bad katkum ka jingpynkylla ia ka rukom siew tulop jong ka sorkar Jylla.”

“Kumta, katkum ka jingshim rai ha ka jingialang jong ka CEC, ka Seng AMSSASTA bad AGHSSASTA kaba la long ha ka 7 tarik Nailur ha Mt Hermon Higher Secondary School Nongstoin, ngi dawa na ka sorkar ba ka dei ban pynkiew noh mardor ia ka tulop jong ngi ki nonghikai SSA ha Meghalaya kat haduh ka 30 tarik Nailur,” ong kine ki ar Seng.

Kumjuh ruh kine ki ar Seng ki la maham ruh ba lada kane ka jingdawa jong ki kam urlong kat haduh ka 30 tarik u Nailur, kumta ruh kin pynlong da ka jingiakhih khlem da buh por ha ka Jylla baroh kawei.