Ai Quit Notice ka Synjuk Waheh Chnong Jowai iaka KSU, 6 shnong bad ka Synjuk Waheh Shnong War Jaintia

Syllad | The Rising MeghalayaAugust 10, 2021

Ka Synjuk Waheh Chong Jowai kala ai da ka Quit Notice haka sngi ba Ar iaki 6 shnong, ka Khasi Students’ Union (KSU), War Jaintia Circle bad Synjuk Waheh Shnong War Jaintia bad khang pyrshah ia ki ba kim bit shuh ban wan sha Jowai hadien ba kila bteng ban pyrshah ïaka jingtheh ñiut ka sor Jowai ha Mynkjai.

Ka Synjuk Waheh Chnong Jowai kala shim ia kane ka rai haka jingialang hadien ka jingrah placard ban pyrshah iaka jingkuman ka sorkar lyngba ka tnad Urban Affairs ban pynkhuid iaki niut kiba mih na ki iew ki hat bad ki iing ki sem ha Jowai.

“Kane ka jingai Quit Notice iaki 6 shnong naduh lad Demthring, KSU War Jaintia Circle bad ka Synjuk Waheh Shnong War Jaintia ka dei namar ba kim sngewthuh iaka jingeh ka Jowai na ki ñiut bad ka bha ia ki ba sangeh shuwa ban wan sha Jowai,” la ong u ma Riquoma Rq Laloo, Secretary Synjuk Waheh Chnong Jowai.

Kane ka jaka theh ñiut kam dei kaba dang mynnin mynta, hynrei ka jingpyrshah jong ki 6 shnong bad ka KSU bad ka Synjuk Waheh Shnong ka long ba kim sngewthuh iaka jingeh jong ki paidbah nalor baka Jowai ka dei ka iitkhmih ka District kaba wan iew wan hat da baroh ki nongshong shnong na kylleng ka district.

Kane ka Quit Notice kan treikam mardor, tad haduh ba ka sorkar kan pynjem iaka jingeh halor ka kam bret ñiut.