Ai resol u Conrad iaka Trinamool Congress ba kan nym jop palat iaka 5 seat

Syllad | The Rising MeghalayaFebruary 4, 2023

U National President jong ka seng NPP bad u Chief Minister ka Jylla Meghalaya u Conrad K Sangma ula ïathuh lypa ïaki paidbah jong ka rilum Jaintia ba ka Trinamool Congress ne ka TMC kan nym jop palat san tylli ki seat na ka 60 tylli ki seat ha kane ka eleshon MLA kaba mynta.

U Sangma ula ong ïa kane ha ka jingïalang paidbah jong ka NPP jong baroh 7 tylli ki Constituency ha rilum Jaintia ha madan Jrisaleiñ Chutwakhu, Jowai haka sngi Thohdieng.

Ula ong ruh ba u nongïalam rangbah jong ka TMC u Dr. Mukul Sangma ula shet kylla ïaki paidbah jong ka Ampati Constituency kiba la pynjop ïa u, la 5 term hynrei khatduh khatwai ula ïehnoh ïaka bad ula mih khmat noh na Songsak hynrei mynta u Dr Mukul ïalade u don haka jingeh namar ba ki paidbah jong ka Tikrikila Constituency ki la ong ha u, ba lada u Dr Mukul um ai da ka jingsoi kular ba un nym ïehnoh ïaki, kin nym treh thep vote ïa u namar u Dr Mukul u ïeng na artylli  ki Constituency kata ka Songsak bad Tikrikila.

U National President jong ka NPP ula pynpaw ïa jingsngewburom jong u ïaka Mamata Banerjee ka President jong ka TMC namar ka la burom shwa ïa Purno A Sangma u nongthaw nongseng jong ka NPP hynrei ka eleshon ka dei ka eleshon bad ka pher.

U Conrad ula ong ba ka Mamata Banerjee ha kawei na ka jingkren jong ka, ha West Bengal ka la ong ba ha West Bengal kam don jaka shu ïa kiwei ki National Party namar ba la don ka TMC te mynta kumjuh ha Meghalaya kata ka jingong ka Mamata Banerjee ka trei kam namar ka la don ka NPP kaba mih na Meghalaya te kumta um don jaka shu ïa kiwei ki National Party.

Haba put turoi ïaki kam kiba ka sorkar NPP ka la leh ha kine san snem bala leit, u Chief Minister ka Meghalaya ula ïathuh ba haki 15 snem bala leit ka Meghalaya ka la shna tang 700 km ka surok na ka skhim PMGSY bad bun ki skhim kiba sahteng hynrei ka jingshimti jong ki ka jingshna surok na katei ka skhim PMGSY ka la kiew sha 2000 km bad ha ka jingpyntreikam ïaka skhim Jal Jeevan Mission ne JJM haduh 3 lak tylli ki longïing ki la ïoh um bam umdih ha ïing bad ka jingai tika ïaki khyllung ka la kiew sha ka 97% ha ki san snem bala leit nalor kiwei kiwei de.

Haba jubab ïaka jingkynnoh ki liang pyrshah ba ka sorkar NPP kadei ka sorkar kaba tlot, u Conrad ula ong ba ka don jingïapher hapdeng ka jingtlot bad jingjem ba ka sorkar jong u, ka pyrshang ban pynbeit ïaki jingeh da ka lynti ka jingïakren bad ym dei da ka jingpyndon kam da ka bor ki pulit.

Ula ther tyngeh ïa u Dr Mukul Sangma uba la pyndonkam da ka bor ki kuli ki lathi haka por jinglong Chief Minister haba mih kino kino ki kynrum kynram.