Ai sboh ka SIM iaki dieng kiba la thung ha Syntu Ksiar

Syllad | The Rising MeghalayaAugust 28, 2022

Ka Sarot I Man (SIM) haka Sngi U Blei kala hiar ban pynkhuid bad ai khyndew ne sboh ïaki tynrai dieng kiba ka la thung haki khyndiat bnai ba la dep ha Kiang Nangbah Memorial Park, Syntu Ksiar, Panaliar, Jowai.

Kane ka jingleh ka SIM ka long ban pyni nuksa ïa kiwei ba haba thung ïa kino kino ki dieng, dei ban leit peit leit pynkhuid ne sumar lym kumta kan ym don jingmut tang ban thung.

Ka kynhun haka jingïalang, ka la rai ban leh ïa kane namar bun ki riew shimet, ki sengbhalang, ki shnong ki thaw wat ki tnat treikam sorkar ruh ki leh burom ïaka mei mariang man u snem da kaba thung shibun ki tynrai dieng hynrei ki shongshit tang ha kato hi ka sngi bad ieh ynda la dep thung khlem leit peit leit sumar.

Kumta ka SIM ka la kyntu ïa baroh ki nongshong shnong kiba juh thung dieng ha kino kino ki jaka ban sumar ïaki ban lait sepei ki tynrai dieng.