Ai snam ka Jingiaseng Samla Balang Presbyterian Jowai

Syllad | The Rising MeghalayaJune 20, 2020

Ka Jingiaseng Samla Balang Presbyterian Jowai kala ai snam sngewbha sha ka jaka ka kynshew snam jong ka Blood Bank Jowai kaba don ha Panaliar Jowai haka sngi Thohdieng.

Haduh 12 ngut ki khun samla na Jingiaseng Samla Balang Presbyterian Jowai kila ïoh ban ai snam sngewbha sha ka Blood Bank Jowai.

Kane ka jingai snam sngewbha ka Balang Jowai ka long kum shibynta ban rakhe ‘World Blood Donor Day’ ne ka sngi kyrpang ban ai snam.

Hashuwa ban pynlong ïaka jingai snam la don ka jingïalang kaba lyngkot ba la pynïaid da ka Meghalaya Aids Control Society, State Blood Transfusion Council, Meghalaya ha ka jingiatreialang ka All Licensed Blood Bank of the State.

U Ma OBD Laloo, Chairman Jingiaseng Samla Balang Presbyterian Jowai, ula iathuh ba kane ka jingai snam kadei kum shibynta ban rakhe iaka “World Blood Donor Day” bad ban pynsngewthuh ia u paidbah ba ka jingai snam ka iarap ban ai jingim ia kiba briew kiba donkam snam kyrkieh haka shitom saja.

Ka Dr P Shylla Incharge Blood Bank Civil Hospital, haba kren ka la ïaroh iaki dkhot ka Jingiaseng Samla Balang Presbytreian Jowai bad ki khun samla ka balang kiba wan ban ai snam sngewbha sha ka jaka kynshew snam. Kala ong ruh ba ka jingai snam ym tang ba ka ai jingiarap ia kiba donkam snam, hynrei ka iarap ruh ha kaban tei iaka met ka phad u nongai snam.