Ai snam ka Rotary Club Jowai bad ka Sein Kynjei

Syllad | The Rising MeghalayaFebruary 28, 2021

Ka Rotary Club Jowai bad Ka Sein Kynjei, Panaliar kila ai snam sngewbha haka 27 tarik une u bnai ha Jowai Blood Bank, Panaliar, Jowai.

Haduh 17 ngut ki dkhot jong kine ki ar tylli ki seng kila ai snam sngewbha.

Shuwa ban sdang ka jingai snam la pynlong iaka jingialang lyngkot haka jingpyniaid u Rtn. SK Lato, MPHF President Rotary Club Jowai haka jingiadonlang u Rtn. Dr. Kamwadae Syngkon, u Kermi Phawa, President Sein Kynjei bad kiwei kiwei.

Ka Dr. P.Shylla, Medical & Health Officer In charge Blood Bank Jowai kala batai halor ki jingmyntoi ban ai snam. Kala ong ruh ba mynta ki nongshong shnong ka rilum Jaintia bad kynhun bapher bapher kila wan mih shakhmat ban ai snam sngewbha kaba long ka jingkyrkhu kaba khraw bad iarap shikatdei eh ia kiba donkam snam kyrkieh ban shah sumar.

Ka Rtn. EF Gatphoh Charter President Rotary Club Jowai kala iathuh ba kane ka jingai snam ka long shibynta ban rakhe iaka 116 snem ka Rotary International bad 25 snem ka Rotary Club Jowai.

Kala kyntu bad pynshlur ruh ia baroh ban ai snam sngewbha ban iarap iaki para briew haba pang ba shitom bad kiba donkam snam kyrkieh.