Ai snam sngewbha ka Sarot I Man

Syllad | The Rising MeghalayaApril 2, 2022

Ka Sarot I Man kawei na ki kynhun kaba na Panaliar haka sngi Saitjaiñ kala ai snam sngewbha haka jaka kynshew snam ne Jowai Blood Bank kaba don ha Panaliar, Jowai.

Hashwa ka jingai snam sngewbha la pynlong ka jingïalang lyngkot ba la pynïaid da u Jaitdao Sumer uba la ïathuh lyngkot shaphang ka Sarot I Man bad ki kam jong ka bad ula pynkynmaw ruh ba ha u snem 2021 kane ka kynhun ka la pynlong ïaka jingsynñiang snam sngewbha sha kane ka jaka kynshew snam.

Ka Dr Patricia Shylla, Medical Officer I/c Jowai Blood Bank haka jingkren ka long wat la Sarot I Man kadei ka kynhun kaba ka don tang katto katne ngut ki dkhot hynrei ka pyni nuksa ïa kiwei da kaba mih shakhmat ban synñiang sngewbha ïaka snam.

Ka snam ka long kaba kordor tam haka jingim briew. Ka jingai snam kadei kawei na ki bynta ban pynkhuid ïaka met ka phat jong u/ka briew. Ka la kyntu ïaki nongshong shnong ban mih shakhmat ban synñiang ïaka snam namar ka jingdon ki nongsynñiang snam ne Valuntary Blood Donors ka pyllait im ïa u/ka briew kiba donkam snam.

Ka doktor Shylla, ka la batai ruh shaphang jingngat bad jingsaphriang ka jingpang AIDS bad HIV.

U Ma A. War haka jingkren ula ong, ka snam kadei ka bynta kaba kongsan tam haka met jong u/ka ba don jingim namar ka Blood Circulation ka ïarap ban wanrah ïaka oxygen haka met ka phad jong ki briew.

U briew ula tip lut ïaka Science & technology hynrei ym lah pat ban shna ïaka snam ban die haki pharmacy ne ki dukan.

Ula ong ba ka sorkar ka ïaleh ban wad ki lad ki lynti ban ïada na ki jingpang jingshitom da kaba pynbiang ïaki dawai dashin bad ki jaka sumar hynrei kynmaw ba ka snam kadei kaba donkam tam.

U Jait dao Sumer, ula ai khublei kyrpang ïa u Oliver Shadap Passah, u Anthony Challam, u Wombai Sumer, u Kyllimot Lhuid, u Ram Sumer kiba la don bynta haka jingsynñiang snam sngewbha.