Ai sngewbha Christmas u MDC ka Ummulong Moodymmai da ki tin sopïing, kor synreit dawai bad ka jaka saitjain ha Nongkhroh

Syllad | The Rising MeghalayaDecember 23, 2021

U MDC Ummulong Moodymmai u ma Jesse Suiam ula ai sngewbha Christmas da ki tin sopïing sha ki 20 tylli ki longiing ha ka shnong Nongkroh haka sngi Palei.

U ma Suïam ula noh synñiang da ki tin mar ar ban sha ki 20 tylli ki longïing baduk ka shnong Nongkhroh bad synñiang ruh 20 tylli ki pump siat khñiang shaki nongrep kane ka shnong lyngba ka skhim Special Assistance Grant (SAG) jong u snem 2020-2021.

Nalor kata lyngba ka skhim Special Assistance Grant (SAG) jong u snem 2019-2020 la tei ïaka jaka sait jaiñ ne Washing Platform kaba don lang ïaka jaka rieh slap bad ka umbam umdih haka jinglut kaba 3 lak tyngka.

Ïaki tin sop ïing bad pump siat khñiang nalor ka jaka sait jaiñ, u MDC ula sam bad pyllait paidbah haka jingïalang lyngkot kaba la long ha shnong Nongkhroh haka jingïadonlang u Waheh shnong ka Nongkhroh u Ma Elvin Mynsong, u Waheh shnong ka Moodymmai u Ma Joseph Pariat, ki nongïalam shnong bad kiwei kiwei.

U Ma Jesse Suïam haka jingkren ula ong ka jingthmu ba kongsan ban ai ïa kine ki skhim ka long shibynta ban ïarap ïaki longïing kiba don hapdeng ka jingduk jingkyrduh ban pynbit pynbiang ïaki jingdonkam ki ïing ki sem jong ki.

Na ka liang ki nongshong shnong ki la pynpaw ïa ka jingsngewkmen bad ai khublei ruh ïa u MDC uba la shimkhia lem na ka bynta ka khia ka shon jong ki.