Ai sngewbha dap 50 snem ka Kong Santa Mary T.15 lak ban tei iaka iing hall ka shnong Sonapyrdi

Syllad | The Rising MeghalayaDecember 28, 2024

Ka Kong Santa Mary Shylla MLA ka thain, kala kular ban synniang T. 15 lak lyngba ka scheme SRWP na ka bynta ka jingtei pyndep iaka Multipurpose Community Hall jong ka shnong Sonapyrdi kaba hap hapoh ka Elaka Narpuh, East Jaintia Hills District.

Ia kane ka MLA kala kular haba kren kum ka kongsan haka jingrakhe iaka Jubilee Ksiar (Golden Jubilee 1974-2024) jong ka shnong Sonapyrdi haka 27 tarik Nohprah.

Nalor ka MLA, la donlang ruh da u Ma Emlangky Lamare MDC ka Narpuh, ki Waheh shnong, Secretary Shnong jong ki shnong bapher bapher hapoh ka Elaka Narpuh.

Ka Kong Santa Mary Shylla haka jingkren kala iaroh iaka jingiatylli bad jingiatreilang jong ki nongshong shnong hapoh ka imlang sahlang bad kala kyntu ban pynneh ia kane ka jinglong khnang ban lah ban pyniaid shakhmat iaki kam hapoh ka shnong ka thaw.

Ha kaba iadei bad ka dorkhat bala aiti da ka shnong na ka bynta ka jingtei pyndep iaka Multipurpose Community Hall kaba la mang ban tei haka jinglut kaba 1 klur 48 lak tyngka, ka Kong Santa kala kular ban iarap 15 lak tyngka lyngba ka skhim SRWP bad kular ruh ban wad shuh shuh ki lad jingiarap khnang ban lah ban pyndep pura ia kane ka Hall.

U Ma Emlangky Lamare ula pynpaw ka jingkmen ban tip ba ka shnong Sonapyrdi kala iaid lynti haduh 50 tylli ki snem lyngba ki jingkyrkhu jong U Blei. Ula ong ba ka shnong Sonapyrdi kadei ka shnong kaba la pawnam bad ka don iaki nongshong shnong kiba stad bad shemphang.

Naka liang jong u MDC ruh ula kular ban ai jingiarap na ka bynta ban tei pyndep iaka Multi-purpose Community Hall.

Ha kane ka sngi la pynkup burom ruh iaki nongkitkam shnong barim bad bathymmai, kumjuh ki khun jong ka shnong kiba shong basah sha kiwei ki shnong kiba dei ki nongialam Shnong bad nongialam niam.

Nalorkata la pynkup burom ruh iaki khynnad bad samla kiba pass bha haki kyrdan pule bapher bapher naduh ka kyrdan Post Graduate, Graduate, HSSLC bad SSLC.

Iaka jingialang la pyniaid da u Ma Condrick Lamare Chairman Golden Jubilee, ka jingkren pdiang na u Ma Daiapherbha Lamare Secretary Golden Jubilee, ki jingkren lyngkot na u Waheh shnong Ma Edimon Lamare bad ki kyntien pynwai na u Ma Kwilnis S Suchiang.

Naka liang ka shnong Sonapyrdi kala pynpaw ka jingsngewnguh iaka MLA kaba la iarap bha iaka shnong ha kino kino ki kam jong ka shnong bad khmih lynti ruh ba lyngba ka jingiarap jong ka yn lah ban tei pyndep iaka Multi-purpose Community Hall.