Ai sngewbha ka sorkar da ka pisa ïa ki nongwanrah khusnam sha ka jylla ha ki jinglehkai sport bapher bapher

Syllad | The Rising MeghalayaFebruary 5, 2024

U Myntri Rangbah ka jylla u  Conrad K Sangma, haka 5 tarik Rymphang u lah pynkup burom ïa ki samla kiba lah jop ha ki jinglehkai sport jong ka  Meghalaya Games 2024 bad  Khelo India Youth Games 2024 ha ka jingrakhe ba lah pynlong ha U Soso Tham Auditorium, Shillong. Kiwei de kiba la iadonlang ki kynthup ka Myntri ka tnad Health & Family Welfare ka Kong  Ampareen Lyngdoh bad u Myntri ka tnad Sports & Youth Affairs, u Bah Shakliar Warjri. 

Ha ka jingkren ha kane ka sngi u Conrad K Sangma, u la ai khublei ïa baroh ki nongjop da kaba ong  ka long kaba donkam ban rakhe ïa ka namjop bad ki khusnam kiba la lah ban wallam sha ka jylla. 

“Mynta ka taïew ka long ka taïew ba kongsan hapdeng ba baroh shitaïew lynter ngin rakhe na ka bynta ki samla kiba don bynta ha ki sport, ha ka jingseng kam lajong ne ha ka rwai ka siaw bad baroh ki program ki ban pynlong mynta ka taïew ki dei kiba don jingïadei bad ki samla,” la ong u Myntri Rangbah ka jylla. U la pyntip ruh ba ka jingthmu halor  ka jingpynkup burom bad ka jingithuh ïa ki nongjop napdeng ki samla ka dei ka ban kyntiew khet ïa ki ba kin long ki nuksa bad ki nongai mynsiem na ka bynta kiwei pat. “Nga kwah ban pynpaw hakhmat jongphi ki samla kiba don hangne mynta ka sngi ba phi don ka bynta kaba khraw bad ka jingkitkhlieh  bad kam dei satia tang na ka bynta ka jingjop bad ïoh rah takma ne ban ïoh khusnam hynrei phi kylla long ki nuksa bad ki nongprat hapdeng kiba bun”, la ong u Myntri Rangbah.

Na ka liang u Myntri Rangbah u la pynpaw ruh ka jingsngewnguh na ka bynta ka MSOA, ki shnat treikam bad ka tnad treikam jong ka Sport halor ka jingnoh synñiang jong ki  na ka bynta ka jinglah ban pynpoi sha ka thong ïa ka Meghalaya Games. “Ki don ki jingeh  bad jingtynjuh hynrei manla u snem  ba ka jingpynlong ïa kane ka jinglehkai kan nanglah ban jam sha khmat bad lah ban ïakhun pyrshah ki jingeh” ula bynrap

Ha ka jingai khublei ka kynhun lehkai football kaba lah ïoh rah ïa ka cup ha ka Khelo India Youth Games u Myntri Rangbah u la ong ba kane ka kynhun ka dei kaba la wanrah ka jingsngew sarong na ka bynta ka jylla bad ban ruh da kaba ong, “ki dei kiba la poi sha ka thong jong ka jingjop bad kane ka kdew shai ba lada ngi raikut bad pynleit jingmut ngi dei ban kynjoh sha ka thong ba ngi don”, la kren pynkut u Myntri Rangbah ka jylla.

Hashuwa kane, U Myntri ka tnad Sports & Youth Affairs, u Bah Shakliar Warjri  u la pynkynmaw ïa ki samla ba ka pisa ba ki ïoh ki dei ban pyndonkam hok ïa ka na ka bynta ka jinglah ban kyntiew shuh shuh halor ka sap ka talen ba ki don ha ka sport. “Ngi na ka liang ka sorkar ngi la pdiang ban ithuh ïa ka jingtrei shitom jongphi  haduh ba phi lah ïoh ban kheit ïa u soh ka jingjop hynrei kane kam shym dei satia kaba kut, phi dei ban buh shuh shuh ka thong kaba kham ha kynjang namar phi dei ka lawei jong ka jylla”.

Hadien kane ki kynrem ki lyndan ki la don bynta ban sam ka khusnam da ka pisa sha kito kiba la ïoh khur ki tamka ha ki jinglehkai bapher bapher kiba don 1170 ngut bad ka pisa baroh kala kynjoh sha ka T.88.63 lakh.