Ai u Myntri Rangbah Conrad K Sangma mar 1 lak sha ki nongthoh khubor ba rangbah ka Jylla

Syllad | The Rising MeghalayaSeptember 21, 2024

U Conrad K Sangma ula ai mar shi lak tyngka sha ki 8 ngut ki nongthoh khubor kiba la rangbah ba shah pynkup burom haka Media Meet kaba nyngkong eh kaba la pynlong da ka Directorate of Information & Public Relations, ka sorkar Jylla ha Taj Vivanta, Shillong haka 20 tarik Nailur.

Kane ka song pisa kaba la ai u Conrad ka dei lyngba ka CMSG.

Ki nongthoh khubor kiba la shah pynkup burom ki dei u P Marwein, Editor, Youth Today, u Subroto Bhattacharjee, Bureau Chief, UNI, RM Shabong, Editor, U Rupang, M M Thaiang, Editor, Yutip, Manas Choudhury, Former Editor, The Shillong Times, Sanat Chakraborty, Independent Journalist, Linda Chhakchhuak, Independent Journalist bad Sanjib Bhattacharjee, Photographer, The Shillong Times.

Ka phang pdeng jong kane ka Media Meet ne ka jingialang jong ki nongthoh khubor ka dei ka Redefining Journalism in the Digital Age.

U Myntri Rangbah, Conrad K Sangma ula long kum u kongsan haka jingialang plie ia kane ka meet,  bad ka Myntri ka tnad Information & Public Relations, Dr Mazel Ampareen Lyngdoh kala long kum ka symbud kongsan. La don ryngkat ruh u Commissioner & Secretary, Information & Public Relations, Vijay Mantri bad u Director, I&PR, Malthus Sangma.

Ha ka jingkren sdang jong u, u Myntri Rangbah, Conrad K Sangma, u la ong ba dang donkam shibun ban ithuh ia ki jingnoh synniang jong ki nongthoh khubor bad u la bynrap, “Kane ka dei ka por ba ngi kum ka sorkar ngi sngew donkam ban pynlong ia kum kine ki prokram ban ithuh bad pynkup burom ia ka jingtrei shitom jong ki nongthoh khubor, ban iakynduh bad iakren halor ka lynti ban iaid shaphrang ha ka jingmyntoi jong ka kynhun ki nongthoh khubor ban pynthikna ba kane ka kam kan kiew kan roi da kaba bud ia ki kyndon bad ban trei katkum ka jingiaid ka por bad ka technology.”

U Myntri Rangbah u la ong ruh ba ka Journalism kam dei tang ban thoh, hynrei donkam ban pyniadei katkum ka jingkylla ha ka technology bad ban pynbha ia ki bynta bapher jong ka journalism, ki jinghikai ba man ka por bad ki exposure trip iaki nongthoh khubor.

U Myntri Rangbah u la banjur ruh halor ka jingdonkam jong ka jingkynthoh kaba bha tei iaka synshar paidbah. U la bynrap ba haka juk mynta namar ka technology donkam ban pyniakhlad hapdeng ka jingtip bad ka jingsngew bad ki khubor. “Mynta ka jingsngew ne opinion lane ka jingtip la iohi kum ka khubor, hynrei donkam ban pyniapher ,” u la ong.

Ula kdew ruh halor ka jingkongsan ka jingioh jingshaniah ki lad pathai khubor bad katba ngi dang iaid shaphang ka donkam ruh ka jingkynthoh kaba tei ban iatreilang na ka bynta ban tei iaka imlang ka sahlang.

Ka Myntri ka tnad Information & Public Relations, ka Dr Ampareen Lyngdoh ka la ong, “Ka kynhun ki nongthoh khubor ki phai sha ka sorkar na ka bynta shibun ki jingdinkam bad ngi sdang mynta ban iarap ia ki nongthoh khubor bad ban peit ia ki lad ki lynti ban pynbha ia ka jingim bad ki jingtrei jong ki nongthoh khubor bad ban ithuh ia ka jingtrei shitom jong ki nongthoh khubor.”

Kala pynpaw iaka jingsngew kmen ba kawei na ki phang jong ka panel discussion ka long halor ka jingpyniaid ia ki khubor thok bad ki lad jingtip bad kala ong “Nga kyrmen ba ki jingialang mynta kin iakren halor ki lad ki lynti ba bha tam ban pynbeit ia kane ka jingeh haba ha kine ki por ba mynta ki jingktah jong ka social media bad ki jingeh.”