Ailad biang ia ngi ban iakhun eksam MTET pyrta ki nonghikai shah beh kam ha Jowai

Syllad | The Rising MeghalayaJanuary 5, 2021

Ha ka jingkut lad namar ka jingïaw rta bad ka jingphiel ïa ka exam Meghalaya Teacher Eligibility Test (MTET), ki nonghikai skul hapoh ka lama Contractual Teachers All Jaintia Hills Unit (CTAJHU) ka la pynlong da ka jingïaid paidbah ha nongbah Jowai ban dawa ïa ka sorkar Jylla ban pynlong biang ka exam MTET na bynta jong ki.

Kane ka jingïaid paidbah kaba la rah lang ïaki banner, ki placard bad ki jingthoh “Wat bret ia ngi ha dustbin kum ki ñiut ba la dep pyndonkam”, “Ngi la hikai bun snem, ka sorkar kamdei ban shu beh ïa ngi na ka kam”, ryngkat ka jingpyrta lynter surok ‘Ngi dawa ïaka hok, ‘We want job security’ bad kumta ter ter.

Kane ka jingïaid rally ka la sdang na lad Kiang Nangbah Government College bad ïaid lyngba ïaka surok bah National Highway-6 ter ter shaduh Ïawmusiang bad pynkut pat ha madan Jrisaleiñ, Chutwakhu Jowai.

Hadien ka jingïaid paidbah la pynlong ïaka jingïalang lyngkot ba la pynïaid da u Vice President ka CTAJHU u Pherik Ïalih haka jingïadonlang u Vice President ka FKJGP Jaintia Hills u Danny Shadap, ka Secretary CTAJHU ka kong Arbihlang Suchiang bad ki 50 tam ngut eiei ki nonghikai kontrak na baroh ar ki District East bad West Jaintia.

Ka Kong Arbihlang Suchiang haba kren bad ki lad pathai khubor ka la ïathuh ba, la don 1200 ngut ki nonghikai kontrak kiba iakhun ïaka Eksam MTET ba la pynlong na ka bynta u snem 2019 bad ïaka resol la pynmih ha u bnai Rymphang 2020 bad la pass tang 10% napdeng ki 1200 ngut.

“Hadien ka jingbym shym la lah jong ngi ki nonghikai kontrak ban pass ïaka eksamin MTET ka sorkar Jylla ka la weng noh ïa ngi na ka kam nonghikai”, la ong ka Kong Suchiang.

Ka la iathuh ba ka kynhun ha u bnai Nohprah 2020 ka la leit ban iakynduh ïa u Myntri ka tnad pule puthi u Ma Lahkmen Rymbui bad ha katei ka jingïakynduh u myntri ula pyntip ba ha ka jaka jong ki, ka sorkar kan thung da kiwei kiba pass interview.

“Ngi sngewsih haduh katta katta ïa ka jingthmu jong ka sorkar Jylla ban weng kam ïa ki nonghikai khlem da plie lad plie lynti shuh ïa ngi”, pynpaw ka Kong Arbihlang Suchiang.

Ka la iathuh ba bun ki nonghikai kiba la don lypa ha ka kam kidei kiba la palat rta ban wad kam shawei ruh ki la shem jynjar.

Ha kane ka jingïalang ka kynhun nonghikai da kawei ka sur ki la rai ban dawa na ka sorkar Jylla ban ailad biang iaki ban iakhun iaka eksam MTET khnang ba kin ïoh biang ïaka kam bad lada ka sorkar kam sngap ïaki jingkyrpad, ka kynhun kan ïaid shakhmat da ki jingïakhih kiba tyngeh na ka bynta ka ïoh ïaka hok, ka la ong.

U Danny Shadap haka jingkren ula pynsngew iaka jingkyrshan pura jong ka FKJGP ïaka kynhun nonghikai bad ka seng ka kloi ban leit iakynduh iaki nongmih khmat ban pynsngew haki ïaka jingeh jong ki nonghikai.