Aiom Ïakhih

Soolangki LalooMarch 30, 2021

Aiom ïakhih ladei ka por
Pyrshah sorkar, pyrshah riew donbor.
Aiom ïakhih ka juk mynta,
A! ban peit la I thamula.

Balei sha kumne ka jia
Haman ki por man ki kynta ?
Khun ka Ri diengpynkiang ïakynduh,
Man la ka sngi kum ka ding bapluh.

Mano sha baleh ïa kane ka pop ka sang,
Haduh ba hap kit ka pateng kynthei, shynrang.
Ïano sha yn kynnoh, ïano yn kynta,
Ïa ka pateng ba la leit ne ia ka pateng mynta?

Ïakhih ki khun ka Ri ban dawa ïa la ka hok,
Bakla shah bom, shah tied, shah set phatok.
A! balei sha kumne ka jia,
Ïa ki khun ka Ri ha ka juk mynta?

Hynrei bakla pat ki ’riew donbor u wei u ar,
Ha khmat ka ain jah lut u dieng bishar, u dieng synshar.
Madan ki lum, rngad lut ki wah,
Lynti ka hok, ka burom ruh lakhang lakah.

Juk, aiu sha kum kane?
Ïa ka hok la tyllep, ïa ka pop la khyllie.
A! ka juk mynta,
Ban peit la I thamula shisha.

Kat shaba phai dap tang jingialeh
Haba kut u Duk -u Rangli ba kynduh jingeh.
Synshar bad Bishar Hok hapyrthei imat laduh
Lawei ka Ri shano kan poi ym tip shuh.

Ym shuh kum ha ki por mynshuwa,
Ki briew dang bat shisha ia ka hok nylla.
Kiba ieng da ka hok ka nia, ka shi kyntien,
Kiba bat jutang, bad trei khlem kylla ktien