Aiti ka KSU Jowai ïaka ïing ka lanot pluh ding ha Ummulong

Syllad | The Rising MeghalayaFebruary 16, 2022

Ka Khasi Student Union (KSU) Jowai Circle haka sngi Balang kala aiti noh ïaka ïing kaba kala iarap pynshna na ka bynta ka lanot pluh ding haka shnong Ummulong.

Kane ka ïing ka dei jong ka Kong Masuk Challam kaba la shah bam shngniam haka ding haka 21 tarik Naiwieng 2021. Ha kane ka jingjia ar ngut ki khun jong ka Kong Mansuk kila khlad noh.

Ka KSU Jowai Circle kum shibynta ban iarap ia kane ka longïing kala pynshna iaka ïing jong kane ka lanot pluh ding kaba la sdang shna naduh 5 tarik u Kyllalyngkot 2022.

Ha kane ka jingaiti iaka ïing la don ka jingialang kaba lyngkot kaba pyniaid da u Shiningstar Kharbihkhiew Incharge ka KSU West Jaintia Hill District haka jingiadonlang u president KSU central body u Lambokstarwel Marngar, Assistant Waheh Shnong ka Shnong Ummulong Ma Sambor Lamare nalor kiwei kiwei ki dkhot ka KSU.

U Lambokstar Marngar, haba kren u lah ong ba ka jingduh kane ka ïing ka sem ym tang ia ki jingdon jingem hynrei ka la duh ruh ïa ar ngut ki mynsiem ba kordor bad u la ong ba kine pat ngin hap ban pdiang ba kadei ka jing buh beit buh rynti u nongbuh nongthaw.

Ula kitbok kitrwiang bad ai ka jingkyrkhu kyrdoh ia kane ka longiing ba kin ioh iaka met kaba koit kba khiah. Ula ai khublei ia baroh kiba don bynta lem ban synniang ha kaban tei biang ia kane ka iing jong ka kong Challam.