Aiti ka MePDCL sha ka company bar jylla ban pynbiang bording ha South West Khasi; pyrshah MECF bad rai ban sangeh siew bai bording shuwa

Syllad | The Rising MeghalayaApril 15, 2019

SHILLONG: Ki paidbah bad ki Rangbah Shnong jong ka South West Khasi Hills District ryngkat ka jingkyrshan lang jong ki sengbhalang bapher bapher ba don hapoh ka District haka 13 tarik une u bnai kila thaw iaka forum ba la tip kum ka Mawkyrwat Electricity Consumers Forum(MECF) ban pyrshah ïaka jingaiti ka MePDCL ban pynbiang bording da ka company na bar jylla ka Feedback Energy Distribution Company Limited (FEDCO) ha katei ka district.

Ka jingialang kaba long ha katei ka sngi kala pynpaw ka jingpyrshah ba jur iaka jingbymkhein snep bad iaid lait jong ka MePDCL iaki paidbah nongshong shnong ka thain Mawkyrwat ha kaba kala aiti iaka jingpynbiang bording ha South West Khasi Hill sha kane ka company napoh Orissa, kaba dei ban sdang treikam naduh une u bnai April (Iaiong)

Ki paidbah bad nongialam shnong ha katei ka jingialang kila shim ia kine ki rai ba lada ka MePDCL kam pynsngew ne pynshai paidbah iaka Memorandum of Understanding hapdeng jong ka bad ka FEDCO bad katba kam pat wan ban pynshai iaki rukom treikam kane ka Company kin  nym shah ba ka FEDCO kan treikam hapoh ka District South West Khasi.

Ki paidbah ki la dawa ruh ba ka FEDCO kan sangeh shwa iaka jingthungkam thungjam hapoh ka thain bad ka la kyntu ruh iaki paitbah ba kim pat dei ban siew bill lights haka kyrteng jong kane ka company katba ka MePDCL kam pat pynshai bniah halor kane ka bynta.

U Bah Wallambok Syiemiong, Chairman MECF bad u Bah Deling Snaitang, Secretary MECF kila ong ba ka forum kala shim iaka rai ban leit tied iaka jingkhang jong u James Sangma,  Myntri ba dei khmih iaka kam bording jong ka sorkar Meghalaya ban pynsngew iaki jingeh jongki paidbah halor ka bording bad ban dawa ruh iaka jingtuklar jong u halor kane ka bynta.