Aiti ka tnad Horticulture iaka Processing Unit Shynrai Lakadong sha ki nongrep ka West Jaintia Hills

Syllad | The Rising MeghalayaDecember 7, 2021

Ka ophis jong kja tnad Horticulture, West Jaintia Hills District haka sngi ba Ar kala aiti iaka Thadlaskeiñ Processing Unit ne ka jaka tyllait bad pynwandur ia u Shynrai Lakadong ban lah ban iaid iew bha sha ki nongrep ka West Jaintia Hills Farmers Producer Company Ltd.

Ha kane ka jingaiti ia kane ka Processing Unit naka jaka tyllait Shynrai Lakadong laiadonlang u Myntri ka kam rep kam riang u Bah Banteidor Lyngdoh, u KN. Kumar Chairman Meghalaya Farmers (Empowerment) Commission, u D Sathiyan, IFS Secretary Spice Board, Government of India, ka Kong T Sumer Director of Horticulture Meghalaya Shillong, Kong RK. Blah District Horticulture Officer, West Jaintia Hills kaba pyniaid iaka jingialang bad ki nongrep.

U Myntri ula aiti ïa u shabi ha u Bah Chanbor Rymbai uba long u CEO ka West Jaintia Hills Farmers Producer Company Limited kum ka dak ka jingsdang pyntreikam noh ïa katei ka jaka tylliat shynrai.

Kane ka Processing Unit ka don ha Thadlaskein Mukhla ha Horti Hub.

U Bah Banteidor ula ong ba ka Thadlaskeiñ Processing Unit kaba don ha Thadlaskeiñ Horti-Hub, West Jaintia Hills la sdang ïaka ha u snem 2013-2014 hapoh ka skhim Rashtriya Krishi Bima Yojana (RKBY) haka jinglut kaba 75.00 lak tyngka lyngba ka Meghalaya State Agricultural Marketing Board (MSAMB) halor ka thong ban kyntiew ïaka kam rep Shynrai Lakadong na ka bynta ban ïoh jingmyntoi ki nongrep shynrai jong ka District lyngba ka jingshna pynwandur (Processing and value addition) ïa une mar ba ki nongrep ki pynmih.

Ula ïathuh ba ha u snem 2018 ka sorkar ka la shim ïaka rai ban aiti ïa kane Unit haki riew shimet ba kin pynïaid ïaka.

Ula ong ruh ka jingsdang ïaka Mission Lakadong ha u snem 2018 kamdei eh tang ban kyntiew ne pynheh ïaka kam rep shynrai na 2577 hectare sha ka 3652 hectare bad ka jingpynmih kaba 16,000 metric ton sha ka 22,368 metric ton, hynrei ban pyndap pynbiang ïaka jingdawa jong u shynrai Lakadong ha baroh ka ri bad shabar ri kumjuh.

Ula ïathuh ruh ba ka Jylla ka lah ban shalan ïa u shynrai ymtang hapoh ka ri hynrei wat shabar ri kum sha ri UK bad ri Netherlands bad u kyrmen skhem lyngba ka jingsdang ïaka unit kandei ka jingkyrkhu ïaki nongrep.

“U shynrai Lakadong u dei uba mar uba pawnam bha ha kylleng bad ka donkam eh ka long ban kyntiew ïaka jingrep Shynrai Lakadong khnang ban kyntiew ïaka ioh ka kot bad lad kamai jakpoh jong ki nongrep,” la ong u bah Banteidor.

Ula ïathuh ba u shynrai Lakadong u don ïaka curcumin kaba bun bha bad haba nujor bad kiwei jait shynrai une u shynrai Lakadong udei uba bha tam bad baroh ki dawa ïa une u Shynrai naduh ban pynlong dawai bad ban shet ïaki jingbam, la ong shuh shuh u bah Banteidor Lyngdoh.

“U Blei ula kyrkhu shisha ïaka Jylla jong ngi, ha rilum Jaintia ngi don ïa u dewïong hynrei mynta haba la khang ïa u dewïong ngi don ïa u shynrai uba dei ka burom ïaki nongrep kiba la trei shitom shisha”, la ong u Bah Lyngdoh.

Ula ïathuh ruh ba u thrang ban ïohi ba u nongrep un dap un biang ha baroh ki liang kumta ban lait na kino kino ki jingeh jong ki nongrep ula dep ban ïakren bad u Myntri rangbah ka Jylla ban pynïoh shuh shuh ki kali Bolero Pickup bad ban aiti haka iTEAM1971 khnang ban pynsuk ïaki nongrep haka kit ka bah lada jia wan kano kano ka jingtynjuh jong ka khlam.

Hadien pat u Myntri ula hiar sha Madankynsaw ban plie paidbah Farmer Development Centre bad la sam iaki solar dehydrator ne ka kor pynrkhiang shynrai Lakadong sha ki seng nongrep katei ka shnong.