Aiti u Bah Kyrmen Shylla da ka Ambulance sha ka Pamrapaithlu PHC

Syllad | The Rising MeghalayaApril 3, 2025

Khnang ban kyntiew ha ki kam aijingshakri ha ka liang ka koit ka khiah, u Myntri ka sorkar Jylla u Bah Kyrmen Shylla ha ka 2 tarik Iaiong u la aiti da ka ambulance ba la pynioh lyngba ka skhim District Mineral Foundation (DMF) 2024-2025 sha ka Pamrapaithlu PHC hapoh Wapung Block, East Jaintia Hills District.

Haba kren ha ka jingialang ba la pynlong ha phyllaw ka PHC u Myntri u la pynpaw ia ka jingkmen halor ka jinglah ban aiti ia kane ka ambulance sha ki bor pyniaid jong kane ka PHC bad u la iaroh ia u Deputy Commissioner ka District, u Shivansh Awasthi wat haba u la pynthikna ba ka jingpynioh ia kane ka ambulance kaba thymmai ka dei lyngba ka jingpyrshang lang jong baroh kiba don bynta khamtam eh na ka liang u DC uba la trei khlem shongthait ban pynioh ia ka song pisa ban pynbiang ia ka jingdonkam ha ka liang ka koit ka khiah jong ki paid nongshong shnong jong ka thain.

Ha kaba iadei bad ka dorkhas ba la ai da ka Synjuk Dorbar Shnong Pamrapaithlu PHC kaba la kyntu ban kyntiew kyrdan noh ia kane ka PHC sha ka CHC, u Bah Kyrmen u la pynpaw ba un sa rah ia kane ka mat sha ka Myntri ka Tnad ka koit ka khiah bad sha u Myntri Rangbah ka Jylla da kaba pyntip ruh ba ka Sorkar ka kut jingmut skhem ban pynioh ia ka jingshakri kaba bha tam ha ka liang ka koit ka khiah na ka bynta ka jingdonkam jong ki paidbah da kaba khot ruh ia ka jingiatreilang jong baroh kiba don bynta.

Ha kajuh ka por u Myntri u la kyntu ruh ia ki bor pyniaid jong ka PHC ba kin pyndonkam hok ia kane ka ambulance khnang ban pynthikna ia ka jingshan slem jong ka bad ka jingai jingshakri ka ban long ka jingiarap kaba khraw na ka byna kiba pang ba shitom.

Na ka liang u Deputy Commissioner ha ka jingkren u la pynpaw ka jingkyrmen ba kane ka ambulance kan ai ia ka jinshakri kaba bha tam na ka bynta ki nongshong shnong jong ka thain, bad u la shim ruh ia ka kabu ban pynksan ia ka jingdonkam jong ka jingkha khun ha ki jaka sumar khnang ban pynduna ia ka jingkhlad jong ki longkmie kiba kha khun.U la kdew ruh ba ka jingpynbiang ia ki lad ki lynti kiba kham bha ka dei kawei ka lad ban pynshlur ia ki briew ban wan sha ki PHC.

Kiwei pat kiba la ia don lang ha kane ka prokram ki kynthup ia u Block Development Officer, Wapung C&RD Block, Dr T Shylla, District Medical & Health Officer, East Jaintia Hills District, Dr D Shylla, Medical &Health Officer, Pamrapaithlu PHC, Dr R Suchiang, ki ophisar na ka tnad ka koit ka khiah, ki nongialam shnong bad ki nongshong shnong jong ka thain.