Aiti u CM ia ki cheque ba T.21 lak sha ki Sports Club bad Association ban pynkhreh ia ka Meghalaya Games

Syllad | The Rising MeghalayaJanuary 10, 2025

U Myntri Rangbah ka Jylla u Conrad K Sangma ha ka 10 tarik Kyllalyngkot u la aiti ia ki cheque ba kot T.21 lak (kata mar T.1 lak) sha ki 21 tylli ki Sports Club bad Association jong ka West Jaintia Hills District khnang ba kin lah ban pynkhreh ia lade na ka bynta ka Meghalaya Games ka ban wan.

Ia kine ki cheque u CM u la aiti ha ka jingialang plie ia ka jingrakhe dap 100 snem (Centenary Jubilee) jong ka shnong Chutwakhu, West Jaiñtia Hills District ha ka jingiadon lang u Symbud Myntri Rangbah u Bah Snaiwbhalang Dhar, ki MLA u Bah Wailadmiki Shylla, Bah Lahkmen Rymbui nalor kiwei pat.

U Conrad u la pynpaw ruh ia ka jingkmen ban iohi ia ka jingpynkhreh kaba dang iaid shakhmat na ka bynta ka jingpynlong ia ka Meghalaya Games ha Jowai, ia kaba ula ong ba kan dei ka khyllipmat ka ban sah jingmynmaw ia ka West Jaintia Hills.

U la ong ruh ba ka jingbei tyngka ha ki jingtei na ka bynta ki kam ialehkai sports kam dei satia tang ka jingpynlut, hynrei ka dei ka jingpynlut pynsep na ka bynta ban plielad ia ki samla kiba long ka lawei jong ka jylla.