Angnud ka JHADC ban kyntiew ïaka Professional Tax sha ka T.15 hajar

Syllad | The Rising MeghalayaJuly 6, 2020

Ka Jaintia Hills Autonomous District Council (JHADC) namar ka jingtyrkhong ka pla tyngka jong ka, ka angnud ban kyntiew noh iaka khajna Professional Tax naka T.2500 sha ka T.15000.

Ka  JHADC kala pynsngew ia kane ha u Lat ka Jylla dangshen haka jingiakynduh ia u ban dawa ban pynioh iaka bhah khajna na ki mar pohkhyndew kaba mar 50:50 na ka sorkar Jylla.

Haka jingiakren bad Winning Garland Sungoh ula ong ba “Ngi la ioh ka lad ban pynsngew ha u Lat ka Jylla ia shibun ki jingeh ka konsil bad kawei na kine ki mat kadei halor ka Professional Tax namar baka dor kaba heh duh kaba ka konsil ka lah ban kyntiew iaka khajna kadei T.2500 bad katkum ka jingiaid jong ka por ngi sngewdei ban kyntiew noh ia kane ka khajna sha ka T.15000.”

“Ban kyntiew ia ka khajna bad ban pyntreikam iaka, ka donkam ïaka sorkar pdeng ban pynkylla thymmai ïaka article 276 (2) jong ka riti synshar bad ngi la kyrpad ia u Lat ban pynsngew ia kane sha ka sorkar pdeng khnang ban pynbha iaka iarong pisa ka konsil,” ong u ma Winning Garlang Sungoh, EM Taxation.