Angnud ka JNC ban ithuh noh iaka dak Jaintia

Syllad | The Rising MeghalayaFebruary 7, 2024

Ka Jaintia National Council (JNC) kaba thrang dik dik ban ioh jingithuh ki dak Jaintia ne ki Jaintia Phonetic Alphabet kaba la mynjur da ka Jaintia Hills Autonomous District Council (JHADC), ki la leit kynduh ia u CEM jong ka JHADC u Ma Thombor Shiwat ban pan jingshai halor kane ka mat haka sngi Balang.

Haka jingiakynduh bad u CEM, u president rangbah jong ka JNC u Sambormi Lyngdoh ula wad jingshai halor kaei ka lad ka lynti ba ka JHADC ka la shim ban ioh jingithuh noh ia ka dak Jaintia kaba la mynjur da ka iing dorbar jong ka JHADC ha u bnai Lber 2021.

Haba jubab, u Bah Shiwat ula iathuh ba ki la dep phah shaka DCA na ka bynta ban leh ia kaba donkam haba iadei bad ka jingithuh noh iaka dak Jaintia, bad ka DCA ka la dep phah shaka tnad Law jong ka sorkar jylla bad haduh mynta ka dangsah kut sah haka tnad Law.

Pdiang ka JHADC ia ki dak A-B Jaiñtia

Une u president rangbah ula kyntu ruh iaka Myntri ba dei peit iaka tnad Law ka Kong Ampareen Lyngdoh ba kan shimkhia halor kane khnang ban ithuh noh iaka ktien Jaintia kum ka ktien kaba long ain.

Ha kaba iadei bad Elaka Labang Nangphyllut kaba tip mynta kum ka Block-1, na ka liang u CEM ula pyntip ba ka Konsil ban pynim biang ia katei ka Elaka, ka la dep ban thung ia u Dolloi na ka bynta ba un pyllum pyllang iaki Shnong kiba don hapoh katei ka Elaka, hynrei kaba sngewphylla ka long ba haduh mynta ym pat don kino kino ki waheh Shnong hapoh katei ka Elaka ki ban wan shim sanat napoh JHADC.

Na ka liang ka JNC ka la kyntu jur ia u Dolloi ka Elaka Labang Nangphyllut ba un leh ia kaba donkam khnang ba ka JHADC kan lah ban ai ka jingiada kaba pura iaki Shnong Pnar kiba dang hap hapoh katei ka Elaka.