Angnud ka KSU ban kyntiew kyrdan iaka Nartiang PHC sha ka FRU Hospital

Syllad | The Rising MeghalayaJune 29, 2020

Ka Khasi Students’ Union (KSU), Nartiang Modop Unit haka sngi Saitjain (27/06/20) ka la leit ban ia kynduh ia u Doctor Incharge ka Nartiang PHC u Dr R Pohsnem bad ia i Dr S Surong ban iakren naka bynta ka jingangnud jong ka Seng ban kyntiew kyrdan iaka Nartiang PHC shaka First Referral Unit Hospital.

Haka jingiakren bad kitei ki Doctor ka Nartiang PHC, ka Seng ka la pynpaw ba ka la dei ka por ban kyntiew kyrdan iaka Nartiang PHC namar ka Seng ka la lap iaka jinglong jingman ka PHC Nartiang ba ka biang lut ki jingdonkam haba ia nujor bad kiwei pat ki PHC kiba don hapoh ka Thadlaskeiñ Block.

“Ngi naka liang ka seng ngi kyrpad iaka Sorkar ban pynkiew kyrdan noh iaka PHC Nartiang sha ka FRU Hospital katkum ka jingdonkam jong ka por khnang ba katei ka PHC kan nang lah shuh shuh ban ai iaka jingshakri kaba paka bad janai iaki paidbah ka thaiñ” ong u Habanjop Raliang President ka KSU Nartiang Modop Unit.

Haka juh ka por ka KSU kala ai iaka jingiaroh ruh iaka jingtrei shitom ki Doctor, Ki Nurse bad kiwei pat ki nongtrei ka PHC Nartiang hakaba ki la ai iaka jingshakri kaba pynhun ia u paidbah ba wan donkam bad ruh naka liang ka Seng ka la kitbok kitrwiang ia baroh ki nongtrei ka PHC Nartiang ba kin nanglah shuh shuh ban ai iaka jingshakri kaba bha ia ki paidbah.

Ha kane ka jingleit kynduh ia ki Doctor la ia donlang ryngkat ruh ki nongialam ka KSU Jaintia Hills District Unit u O Dkhar President bad u Shaniah Dkhar Asst Finance Secy KSU JHDU.