Angnud ka MSOA ban pynlong iaka NE Olympic Games 2022

Syllad | The Rising MeghalayaJanuary 19, 2022

Ka Meghalaya State Olympic Association (MSOA) ka angnud ban pynlong iaka NE Olympic Games 2022 ha u bnai Risaw lada jem ka jingwan lyngshop ka khlam COVID-19.

Halor kane ki nongialam ka MSOA kiba kynthup ia u Bah John F Kharshiing, Working President, Bah Finely Pariat, General Secretary, Bah Ksan Warjri, Treasurer bad Bah Sabastian Swett, Vice President kila wan ban iakynduh ia u Myntri Rangbah ka Jylla Conrad K Sangma haka sngi ba ar ban pan jingkyrshan ban pynlong ia ka 2nd edition jong ka NE Olympic Games 2022 ha u bnai Risaw (October) 2022 bad kiwei kiwei ki kam sports lada jem ka lyer Covid19.

Haka jingiakynduh ia u Myntri Rangbah ha Secretariat, Shillong ka MSOA kala kyrpad ruh ia ka sorkar ban thaw ki lad kumno ban pynbiang ia katto katne ki jaka ia leh kai kiba dang sah kut kum ka jaka na ka bynta ka jingialehkai  Hockey, Integrated Shooting Range, Equestrian, bad Cycle Velodrome ki bym pat ioh jaka lane rung ha ka draft Master Plan khamtam namar ba mynta ka XXXIX National Games kumba ka long mynta kan dang shimpor ban long.

Ha kane ka liang u CM u la mynjur ban bishar bniah biang ia ka draft master plan halor kitei saw tylli ki jingialehkai.

Ka kynhun MSOA ka la pynsngew ruh ha u CM halor ka jingdonkam ban don ka Meghalaya Olympic Bhavan kaba kyrpang namar ka MSOA ka la donkam ia la ka jong ka office treikam kaba pura. Shuh shuh la pynsngew ha u CM halor ka jingdonkam ban mang pisa kaba kyrpang ia ka equipment bad training na ka bynta ki State Association kiba treikam khatam katkum ki kyndon ka Meghalaya Sports Policy 2019.

La pynsngew ruh ha u CM halor ka jing donkam ban bteng ia ka talent identification program kaba la sdang ha u snem 2017 kum shibynta ban sei ia ki sap kyrpang jong ka jylla ia kaba u Chief Minister u la mynjur ban bishar bniah ia kine ki jingtyrwa baroh na ka MSOA.  Kiwei kiba la ia don lang ha ka jingialang ki long ka Kong WMS Booth, MCS, Director, DSYA, Bah B Syiem, Chief Engineer, Meghalaya State Sports Council, bad u Consultant, E&Y, na ka tnad DSYA.