Angnud ka Nongtalang Mission ban ïoh nam Digital Village

Syllad | The Rising MeghalayaFebruary 16, 2019

JOWAI: U Waheh Shnong ka Nongtalang Misison u Ma HB Rymbui, ula ong baka shnong Nongtalang Misison ka angnud ban ïoh ka nam Digital Village. “Ka shnong kan shong pyrkhat sani bha ban phah ïa ki khynnah samla ban shah hikai kor Computer ban kin ïoh myntoi na ki skhim ba bunjait jong ka sorkar kaba tip mynta kum ka Digital India.

U Waheh Shnong Nongtalang ula ong haba kren haka jinghikai kynshew pisa pilaiñ bad PMGDISHA kaba long haka shnong Nongtalang haka sngi Thohdieng.

Ïa kane ka jingai jinghikai la pynlong da  State Bank of India, Amlarem Branch bad ka CSC e-governance, Meghalaya halor ka skhim PMGDISHA badka   Financial Literacy Camp kaba bei pisa da ka NABARD.

U Joshua Lyngdoh uba long u nongpeit ïaki CSC ha kaba ïa dei bad ka e-governance, ka Digipay, ka Telelaw, ka Telemedicine bad ka PMGDISHA. Ka e-governance ka dei ka jingïarap lyngba ki CSC ba ki paidbah ki lah ban ïoh jingïarap kum kaba applai Schedule Tribe Certificate bad kiwei kiwei, ka Digipay ka jingïarap ban siew ïa ki jingdonkam kum ki ban ïaleh entrance test bad kiwei kiwei, ka Telelaw ka jingïarap ha kaba ïa dei bad ki kam aiñ bad ki lad ïoh jingïarap naka bynta ka koit ka khiah. Kine baroh lah ban ïoh da kaba rung ha ki CSC kiba don ha ki shnong ki thaw jong phi. Ula ban jur ha kaba ïa dei bad ka PMGDISHA kaba long ka lad ba ki nongshong shnong kiba don ha ka rta naduh 18 haduh 60 snem kin ïohlad ban hikai ba kin nang ban leh computer.

U Jiayur Rahman uba long u Branch Manager jong ka State Bank of India Amlarem haba kren u pynshai shaphang ki loan bad ki rukom thep pisa babun jait ba don ha ki bank. La ïoh ruh ïaka jingkren na u V. Khonglah uba la kren halor ka mat ki social security ha ki Bank bad  ka Ka Ameecia Pariat iba long i District CSC e-governance West Jaiñtia Hills District.

U ma Thomlin Nongpoh uba long u nongpynïaid  jong ka Community Service Centre haka shnong Nongtalang ula batai shai shaphang bun ki lad jingïarap kiba ki paidbah ki lah ban ïoh lyngba kine ki CSC, kiba mynshuwa la tip ïa ki kum ki Rainbow service. Ula ong ba mynta la lah ruh ban plie ïa ki bank account bad kumjuh ruh ban ïoh ïa ki jingshakri kiba dei ban ïoh na ki bank hala shnong hi lyngba ka CSC.

U HH Mohrmen uba long u riewshemphang uba la ai ïaka jingkren jong u halor ka jingdonkam ban kynshew pisa ha bank, ban nang ban pyndonkam ïa ki bank. La maham ban long husiar na ki riewsniew bay m bit ban ai Pin number sha kiwei. Ula ong ruh ba ym dei ban ngeit ïa ki e-mail ne ki SMS ba shait pan ki nongthok nongshukor ban ïoh tuh ïa ka pisa kaba ki paidbah ki don haka Bank.