Angnud u Ma Sniawbhalang Dhar ban pynkylla dur iaka iew Wahiajer

Syllad | The Rising MeghalayaNovember 20, 2019

JOWAI: U Ma Sniawbhalang Dhar, Myntri ka tnad transport bad kiwei kiwei ula ong “Nga angnud ban pynkylla dur ïaka iew Wahiajer da kaba shna pynbha iaki basa iew khnang ban pynsuk ïaki nongshong iew bad ki nongwan thied wan pet ha kane ka iew.”

“Kane ka iew kala wanrah jingmyntoi kaba khraw ïaki paid nongrep bad ki nongshong shnong jong ka thain Nartiang bad kiwei kiwei ki shnong ba marjan kumjuh ruh ïaki nongkhaii bad nongwan iew ba ki ioh har rukom ki mar rep bad kane ka iew kadei kawei na ki iew ba rim bha ha Rilum Jaiñtia kaba la kyntiew iaka ioh ka kot jong ki nongrep bad ki nongshong shnong,” la ong u Ma Sniawbhalang Dhar haba plie bad buh maw nongrim ban sdang ïaka iew ba ar sien shitaiew ha ka iew Wahiajer, kata haka sngi iew Pynsiñ bad iew Pyngkat haka Sngi Balang.

Ka JHADC katkum kyndon aiñ Jaintia-Hills Autonomous District Council (Managing and control of Markets) Regulation 1975 hadien ka jingkyrpad jong ka shnong Wahiajer ban pynlong iew ar sien shitaiew ha iew Wahiajer kala ai ka jingmynjur ban pynlong ïa kane ka iew arsien shitaiew ba kynthup iew Pynsiñ bad ka sngi iew Pyngkat

Kane ka ka iew ka hap hapoh ka jingpeit jong ka Wahiajer bad ka heh haduh 4.91 acre.

U Ma Sniawbhalang ula ong ba kane ka jingplie ïa kane ka iew ba arsien shitaiew kan nangkyntiew shuh shuh ïa ka khaïi ka pateng bad ka ïoh ka kot ki shnong ba marjan kane ka iew bad ki nongwan iew na kylleng ka District bad nabar ka District.

U Ma Sniawbhalang ula pynpaw ka jingsngewnguh ïa u ma Thombor Shiwat, CEM ka JHADC bad ka Executive Committee kaba ïalam ha JHADC bad ka sorkar Jylla halor ka jing ai jingmynjur ban pynlong iew arsien shitaiew ha kane ka iew, kaba la bna nam kum ka iew Pynsiñ.

Ula kyntu ïa baroh ki nongwan iew ki nongkhaïi ban shimkabu na kane ka iew, khnang ban kyntiew ïaka ioh ka kot jong ki nongshong shnong bad khot wer ïaki paidbah ban pynlong ïa kane ka iew kaba khuid kaba suba.

Ha kane ka jingplie ïa kane ka iew la ïadonlang u CEM JHADC u Ma Thombor Shiwat, u MLA ka Mawhati u Dasakhiatbha Lamare, u Dy CEM ka JHADC u Lasky Rymbai, ki EM JHADC u Winning Garland Sungoh, U Ma Robinus Syngkon uba pyniaid ïaka jingialang nalor u DC bad SP jong ka West Jaiñtia Hills District, U Chairman bad Secretary jong ka Market Managing Committee, Wahiajer u ma Kmen Shylla bad u ma W Phawa.

U Deputy Commissioner West Jaiñtia Hills U Ma Garod LSN Dykes, ula kyntu ïaki nongwan iew bad ki nongshong iew ban ïakhun pyrshah ïaka jaboh plastic kaba pynsniew dur bad pynjakhlia iaka mariang.

Ha kine ki ar tylli ki sngi iew lada ki hap Sngi U Blei, yn pynkynriah shadien haka sngi iew Pynsiñ yn pynlong iew haka Khyllaw bad ka Pyngkat haka Muchai.