Angnud u Ma Sniawbhalang Dhar ban pynkylla ‘Smart Village’ iaka shnong Ummulong

Syllad | The Rising MeghalayaOctober 2, 2022

U Myntri Pynroi Sor ka Sorkar Jylla, Ma Sniawbhalang Dhar u angnud ban pynkylla iaka shnong Ummulong kum ka ‘Smart Village’ ne kata ka shnong ban long ka nuksa ia kiwei pat ki shnong kaba thaba khrik khrak, kaba khuid ba suba bad wanrah iaki kam tei jingtei bad ki kam pynroi.

Ka shnong Ummulong ka dei ka shnong kaba don ha ka surokbah National Highway 6 bad ka jngai tang kumba 16 KM na Jowai, ka district headquarter jong ka West Jaintia Hills District.

U Sniawbhalang Dhar uba long u MLA ka Nartiang Constituency ula ong ia kane haba kren haka jingialang paidbah ban pan iaka jingkyrshan u paid nongshong shnong ka Ummulong haka sngi Saitjain.

Ha kane ka jingialang da ki spah ngut ki paidbah kiba kyrshan ia u ma Sniawbhlang kila mih paidbah ban ai ka jingkyrshan ia u sha ka election MLA kaban sa long ha kine ki 5 bnai ban wan kum u kyrtong ka NPP.

U Ma Sniawbhalang ha kane ka jingialang u la pdiang sngewbha ruh iaki nongkyrshan ka party Congress kiba la wan iasoh sha ka party NPP bad kiba la rai ban ai ka jingkyrshan kaba pura ia u ha kane ka elekshon ban wan. Ula ong ruh ba kum ki briew dei ban long ki briew kiba jynsur bad ban long kiba kloi ban map iwei ia iwei ha kano kano ka map ban myntoi ka shnong ka thaw.

Shuh shuh ha kane ka sngi la pynskhem iaki nongtrei kam ka party NPP ha Ummulong. La jied president ia u Brione Pohshna, secretary-Embok Suting, vice president-Mawsiang Nongrum, assistant secretary-Banker Siangshai.

La jied president Women’s wing iaka Florida Shylla, secretary-Wanda Lamare, katba ka Youth wing la jied president ia u Banker Siangshai, secretary-Rikio Shylla.

Ha kane ka juh ka sngi u ma Sniawbhalang ula hiar sha Moodymmai ban pynskhem iaki nongtrei ka party ban pynkhlain shuh shuh iaka party.