Ap ka kuna kaba T.5000 iaki paidbah ba bret ñiut pathar haka ïitkhmih ka Jowai

Syllad | The Rising MeghalayaJanuary 23, 2021

Ka Dorbar Shnong Tympang Iawmusiang kala pynbna paidbah ba kan shain kuna haduh T.5000 ia ki briew kiba bret pathar iaki ñiut kat shaba lap ba shem.

Ka Dorbar Shnong haka jingialam u ma Edystone Shylla kum u Waheh Chnong kala shim iaka sienjam ban wanrah iaka khuid ka suba jong ka iew Iawmusiang naduh ka jingiakhun iaka khlam COVID-19 ha u snem 2020 bad kane kala wanrah shisha katto katne ki jingkylla ha kaba ki briew kila sdang ban bret iaki ñiut ki nier ha ki jaka ba dei ban bret.

Pynban marsien plie ki iew ki hat, ka rukum bret ñiut ki nongshong die jingdie, ki paidbah kiba ba iaid ba ieng ha Iawmusiang kala sdang biang iaka rukom kaba rim ban bret biang iaki ñiut katba shaba lap ba shem.

U Chairman Shnong ka Iawmusiang u ma Wompher Nartiang, ula ong ka shnong kala lap ba ki dang don ki paidbah kiba bret pathar iaki ñiut hapoh u pud u sam ka Iawmusiang naduh ka lad Thomas Jones Synod College, ki jaka shong die jingdie ha shilynter ka Iawmusiang bad ha khmat DC bad kane kala theh umpjah iaka jingtrei shitom ka shnong ban pynneh pynsah iaka jingkhuid suba.

“Haka jingialang kaba long dangshen ngi la rai ban shain kuna ïaki paidbah kiba leh jakhlia, haka sien kaba nyngkong lada lap ia kino kino kiba bret pathar iaki ñiut ka naduh ki jaboh plastic bad kiwei kiwei ñiut ki ñier ka kuna kalong T.100 bad haka sien kaba ar lada lap biang ba u juh u briew u bret ñiut pathar ka kuna kanlong T.5000,” la ong u ma Wompher bad kyntu ba ki paidbah bad ki nongshong dukan ba ki dei ban bret ruh iaki ñiut ha ka por ba wan ka kali Jowai Municipal Board bad ban bud ryntih iaki aiñ ki kyndon jong ka MSPCB ba nym bret pathar bad thang pathar iaki ñiut ki nier.

U General Secretary ma Ajoy Lywait, ula kyntu iaki nongshong shnong ban pynneh iaka khuid ka suba ka Wah Myntdu. Ula ong ba ki don ki katto katne ki jaka ba jur bha ka jingtuid ki jakhlia sha ka Wah Myntdu kum ka Chahtngit, Wah Gate, Ïngkieng Moo, Riatsasim kiba ki briew ki bret bad lumthup ïaki ñiut bad kine ki tuid sha Wah Myntdu, kaba bsa um iaka sor Jowai.

Ula ban jur iaki paidbah ban bret iaki niut ki nier jong ki ha ki jaka ba dei khnang ba iada iaka wah Myntdu.

Ka bor shnong kala kyntu ruh iaki briew kiba pyndonkam da ka kali ban shong dih kyiad ha ki jaka ba dum bad ban leh kino kino ki kam ban pynsyier iaki kynthei khynnah ba iaid ba ieng. La kyntu ruh iaki nongniah kali ban nym pynher sted iaki kali motor ha u pud u sam ka Iawmusiang, ban shngain ka leit ka wan u paidbah bad ban nym wanrah kino kino ki jingjia ba sngewsih.

Ha kane ka jingiakren bad ki nongthoh khubor la iadonlang u Waheh Shnong MA Edystone Shylla, Assistant Waheh Shnong Latu Nartiang bad u Assistant Secretary u ma D Nartiang.

Ka dorbar shnong Iawmusiang ka ai khublei iaka bor synshar district bad ka Jowai Municipal Board kiba la trei shitom ban wanrah iaka khuid ka suba jong ka Iawmusiang.