Ap ka Sorkar ia ka jingmynjur ka AICTE ban sdang klas ka Shillong Engineering College 

Syllad | The Rising MeghalayaMarch 5, 2025

U Myntri ka Tnad Pule Puthi u Rakkam A Sangma ha ka 4 tarik Lber u la pyntip hapoh ka iingdorbar ba ka Sorkar ka dang ap ia ka jingmynjur jong ka All India Council for Technical Education (AICTE) na ka bynta ban sdang noh ia ka jingshim klas jong ka Shillong Government College of Engineering (SGCE) kaba don ha Mawlai Kynton Massar.

Haba jubab ha ka kynta buh jingkylli, u Rakkam u la ong ba ka SGCE ha ka 26 tarik Nohprah 2024 ka la aplai ban ioh ia ka jingmynjur ka AICTE na ka bynta ban sdang ia ki artylli ki technical course, kata ka Civil Engineering bad Electrical Engineering.

Hadien kane, ka AICTE ka la pynlong ia ki artylli ki jingialang bishar ia ki kot ki sla ha ka 22 tarik Kyllalyngkot 2025 bad 4 tarik Rymphang 2025.

“Ki riew shemphang na ka AICTE ki la aijingmut ia ki bor pyniaid jong ka college ba ki dei ban pynbiang halor ki katto katne ki jingtei kiba dang duna ia kiba mynta la dep ban shim khia,” u la bynrap.

U Rakkam u la pyntip ruh ba ka jingtei ia ka building kaba kynthup ia ka Academic Block bad Administrative Block kumjuh ia ka hostel na ka bynta ki shynrang bad kynthei jong ka SGCE ka dei kaba la dep ban pyntrei bad la plie da u Myntri Rangbah ka Jylla u Conrad K Sangma ha ka 16 tarik u Kyllalyngkot 2023.

Kumjuh ka jingpynbiang ha kaba iadei bad ka jingpynpoi um, bording elektrik bad kiwei pat ha SGCE ki la biang lut.

Nalor kata u la ong ba ka sorkar ka la pynsngew ia ka jingmynjur ban seng ia ka SGCE bad ka la mang ruh haduh 55 tylli ki kam. Ka sorkar ka la shah ruh ia u Additional Director Polytechnic & Shillong Engineering College ba un bat lang kum u Principal jong ka SGCE.

“Ka Sorkar ka la mynjur ruh ban thung ia 13 ngut ki nonghikai jong ka Shillong Polytechnic kiba la biang ka kyrdan ban hikai hapoh ka Engineering College,” ong u Rakkam haba pyntip ba ka skulbah North Eastern Hill University (NEHU) ruh ka la ai ka jingmynjur halor ka jingpyniasoh jong ka SGCE na ka bynta lai snem.

“Kumta hadien ba ngi la ioh ia ka jingbit na ka AICTE ngin sa sdang noh kham kloi ia ka jingshm klas,” u la pynthikna.