Ap ka Sorkar ia ka rai ka HNLC halor ka jingkyrpad ia ki nongialam ban wan da lade sha ka jingiakren iasuk

Syllad | The Rising MeghalayaNovember 14, 2023

U Symbud Myntri Rangbah ka Jylla uba khmih ruh ia ka Tnat kam Pohiing (Police), u Bah Prestone Tynsong hynne ka sngi ba Ar u la ong ba na ka liang ka Sorkar jylla ka dang ap ia ka rai jong ka Seng Hynniewtrep National Liberation Council (HNLC) halor ka jingkyrpad ia ki nongialam jong ka ba kin wan mih da lade sha ka jingiakren iasuk ha ka kylla ka ban wan.

Haba kren sha ki lad pathai khubor, u Bah Tynsong u la ong; “Sa shisien pat nga iai ban ba ka sorkar Jylla bad ka Sorkar Pdeng ki ieng skhem halor ka nongrim ba ki don ia ka jingangnud ban bteng ia ka jingiakren bad ka HNLC.”

“Haduh mynta ngi dang ap ia ki jingtip na ka liang ka HNLC namar ba ki nongialam ba hakhliehduh kim pat lah satia ban wan iashim bynta ha ka jingialang, kumta ruh ngi la phah ia ki (dkhot ka HNLC) ryngkat ka jingkyrpad ka jong ngi ba lada ki long kiba la kloi kin aijintip sha ngi namar na ka liang ka sorkar jylla bad ka sorkar pdeng ki dang ap khmih lynti na ka bynta kawei pat ka jingiakren kaba bud,” ong u Myntri.

Shuh shuh u Bah Tynsong u la ong; ‘Ia mynta hi ka jingiakren ba pura ka la dep long tang shisien bad phi tip ruh ba kane ka jingiakren ka la long tang bad ki nongialam kiba ha ka kyrdan kaba kham hapoh ne ‘second rank’. Kumta ngi kyrpad ba ha ka jingialang kaba ar ne ba lai, ki nongialam ba hakhliehduh ki dei ban ia don ryngkat lang ha ka jingiakren ha kaba ngin sa iakren halor kino kino ki mat bad ban shim ia ki sienjam ban wan shakhmat ha ryngkat kino kino ki jingmih lyngba ka jingiakren.”