Ap ka Sorkar ia ka rai ka NTA halor ka jingkyrpad ban pynlong biang ia ka eksam NEET

Syllad | The Rising MeghalayaMay 10, 2024

Ka Sorkar Jylla ka la buh ka jingkyrpad ia ka National Testing Agency (NTA) ba kan pynlong biang ia ka eksam jong ka National Eligibility cum Entrance (NEET), hadien ba ki la mih ki jingkynnoh leh thurmur ha kaba pynlong ia kane ka eksam kaba dang shu dep ha ka 5 tarik mynta u bnai.

Haba kren sha ki lad pathai khubor haka 9 tarik Jymmang, u Myntri ka Tnat pule puthi ka sorkar Jylla u Rakkam A Sangma u la ong, “Nga la ioh ban iakren da lade hi ia u Chairman ka NTA ban kyrpad na ka bynta ban pynlong biang ia kane ka eksam lada ka long kaba lah.” 

U Rakkam u la pynlong ruh ia ka jingialang ha ryngkat ki nongmihkhmat na ka Khasi Students’ Union (KSU) bad ka Jaintia Students’ Union (JSU) ha kaba iadei bad kane ka kam.

“U Chairman ka NTA u la pyntip sha nga ba ki dang bishar bniah halor ki jingshisha baroh halor kaei kaba la jia ha ka por ba la pynlong ia ka eksam. Hynrei, kim pat shym la ai satia kano kano ka jingpyntrip sha nga,” u la ong.

Haba kylla, une u Myntri u la ong ba na ka liang ka NTA ka la pan ia ka kaiphot na ki centre kiba pynlong ia kane ka eksam. “Kumta ruh ngi dang ap ia ka jingshim rai jong ka NTA ha kaba iadei bad kane ka phang,” ong u Myntri.

Nalor kata u Rakkam u la ong ba na ka liang u Myntri Rangbah ka Jylla u Conrad K Sangma ruh u la shimkhia halor kane ka kam da kaba iakren ia ki bor ba dei khmih ha Delhi.

U Rakkam u la pyntip ba na kal iang u Principal Secretary uba khmih ia ka Tnat ka koit ka khiah ka sorkar Jylla ruh u la pynlong ka jingiakren bad ki bor pyniaid ka NTA.

Na ka liang ka kynhun kaba mihkhmat ha ryngkat ki samla pule kiba la shah ktah ha ka jingpynlong ia kane ka eksam ruh ki la kyntu ia u Myntri ka Tnat pule puthi ka sorkar Jylla ba un tuklar lem bad ban pynthikna ba kin ioh ban thoh biang ia ka eksam jong ka NEET ha West Jaintia Hills bad Ri Bhoi district.