Ap u tala iaka ïing treikam ka Lumshnong C&RD Block

Syllad | The Rising MeghalayaJanuary 26, 2024

Wat hadien shisnem bala dep ban plie paidbah iaka Lumshnong C&RD Block ha East Jaintia Hills District, kaba thamula pat kalong ba tang u tala ba ap ia kane iing treikam ka block kaba don ha Lumshnong bad la kynnoh ba ka sorkar kam lah satia ban siew iaka tulop ki nongtrei.

Ka Jaiñtia National Council JNC-CEC haka 25 tarik Kyllalyngkot ka la iakynduh ia u Deputy Commissioner ka East Jaintia Hills District ban pan jingshai halor ka jingkhang khyrdep ka C&RD Block Lumshnong da ki bun bun bnai.

Ha u kyrwoh ba la phah u Information Secretary JNC u Mebanteilang Sukhlaiñ, ula ong ba Deputy Commissioner u Abhilash Baranwal ula pyntip ba ka jingkhang khyrdep jong katei ka jaka treikam sorkar ka long namar ka jingbym don nongtrei na kadaw ka jingbym ioh ki nongtrei iaka jingsiew ne tulop.

Shuh shuh u DC u pynpaw haka seng ba ka jingbym ioh tulop jong ki nongtrei kiba dei na ki Shnong ba jngai la lumba 4 haduh 5 bnai ka la pynlong iaki ban sangeh noh ban leit trei.

Ka JNC ka la ong hato ia katei ka Block ophis la wanrah tang namar ba la jan ka election, namar kum ban shu pynkynmaw ba ia katei ka block la plie paidbah haka 4 tarik Nohprah 2022 kata hashwa jong ka Election MLA 2023.

Ka seng ka la kyntu iaka sorkar khamtam ka MLA jong ka thain ba kan leh eiei halor kane khnang ban myntoi ki paidbah jong ka thain bad ha kajuh ka por la kyrpad iaka sorkar ban pynrung nongtrei shuh khnang ba ki samla wad kam wad jam ka thaiñ Narpuh kin ioh jingmyntoi lyngba kane ka block.