Ar bnai ai por ka Meghalaya HC ia ka NHAI ban maramot ia ka bynta ka surok NH-6

Syllad | The Rising MeghalayaNovember 6, 2024

Ka Iingkashari High Court ka Meghalaya ka la bthah ia ka National Highway Authority of India (NHAI) ba kan maramot ne shna thymmai noh ia ka bynta jong ka surok National Highway-6 kaba jngai kumba 5 Km kaba la jot rathai hapoh East Jaintia Hills bad ai por hapoh ar bnai ban leh ia kane.

Ia kane ka hukum la pynmih da ka Division Bench jong ka High Court ha ka por ba la bishar ia ka PIL No. 11 jong u 2022 hapdeng u Kynjaimon Amse (naduh ba u la khlad noh) pyrshah ia ka NHAI bad kiwei.

Ka Kashari ka la ong, “Hapoh ar taiew naduh ba la pyntip ia kane ka hukum, ka NHAI ka dei ban shim ia ki sienjam kiba kyrkieh khnang ba haduh ban da pyndep ia ka kam kaba man ka por, kata ka bynta ba la kdew jong katei ka surok bah kan long kaba lah ban iaid da ki kali.”

Ka Kashari ka la bthah ruh ba ia ka bynta kaba sah jong ka 45 Km ka surok dei ban pyndep shwa ban sdang biang ka aiom slap ka ban sa wan, kata hapoh ka san bnai naduh ka tarik ba la buh.

“Ki bor ba dei khmih ki dei ban pynthikna ba ka jingpyntrei ia ka kam ka dei ban long kaba janai khnang ba kan ym ngat ha ka jingshah pynjulor da kaba suk ha u slap bad kiwei pat ki jingshah ktah ha ki bor mariang ha ki por ki ban wan,” ong ka hukum ka Kashari.

Ka Kashari ka la shim ba ka phang jong katei ka PIL ba la kdew ka dei ka bynta jong ka surok NH-6 kaba ha ka jingjngai kaba 102.255 km hapdeng ka sor Jowai bad ka Ratacherra namar ba kane ka surok ka long u budlum ba kongsan ia ka Jylla Meghalaya, Tripura bad Mizoram.

Ha kane ka jingshim bishar, ka Kashari ka la pyntip ba ki la iaid lyngba ia ka kaiphod jong u Suraj Panthi, u Advocate, u Amicus Curiae ba la thung da ka Kashari ha kane ka PIL.

Ka Kashari ka la kdew ba ka la iohi ia ki dur ba la aiti ha kaba la pyni ia ki katto katne ki bynta jong ka surok NH-6 kiba la julor bad jot rathai bad kaba la i shem jingeh shibun ia ki kali ba kin lah ban iaid, hynrei ka kaiphod kam shym la kdew ia ka bynta jong kane ka jaka kaba la jot rathai.

Na ka liang u S Sengupta u nongsaid ain uba la mihkhmat ia ka NHAI u kwah ban kdew shai ia ka bynta jong katei ka surok ba la jot rathai khnang ba un lah ban bthah ia ka NHAI ba kan shim mardor ia ki sienjam kiba donkam.

Ka Kashari ka la bthah ia u S. Panthi, u Amicus curiae ban pyntip mardor sha ka NHAI shaphang ka jaka bad ka jingjrong ba la antad jong kane ka bynta jong ka surok bah kaba la julor.

Ka Kashari ka la bthah ia ka sorkar Jylla ban siew bai lutksan ia ka Amicus Curiae ad hoc kaba la buh jingkhein T. 30,000/- haduh u bnai Nohprah. Ka Kashari ka la buh ruh ban pynsngew biang halor kane ka PIL ha ka 11 tarik u Nohprah 2024.