Ar bnai ai por ka MSSASA ia ka Sorkar ban thaw polisi thungkam pura ia ki nonghikai

Syllad | The Rising MeghalayaOctober 2, 2024

Ki nonghikai skul SSA hapoh ka lama jong ka Meghalaya Sarva Shiksha Abhiyan Schools’ Association (MSSASA) ha ka 2 tarik Risaw ki la ai por ar bnai ia ka Sorkar Jylla ba kan pyntreikam ia ka polisi ban thungkam pura ia ki nonghikai skul SSA.        

Haba kren sha ki lad pathai khubor u President ka MSSASA u Bah Aristotle C Rymbai u la ong, “Hadien ka jingiamir jingmut bad bishar bniah, ngi la shim ia ka rai ban jied ne kyntait napdeng ki artylli ki mat, kata ka jingpynkiew ia ka tulop bad halor ka jingshngain ha ka jingshakri ha ka kam. Ngi la jied ban banbor ia ka Sorkar ba kan wanrah ia ka polisi ban pynskhem ia ka jingshakri jong ki nonghikai SSA ha ka Jylla Meghalaya kumba la leh ha kiwei pat ki Jylla jong ka ri.”         

“Ngi la shim ruh ia ka rai ban ai por ar bnai ia ka sorkar Jylla ba kan wanrah ia kane ka polisi. Hapoh jong kine ki ar bnai, ka Tnad pule puthi ka dei ban pyndep ia baroh ki jingdonkam bad aiti sha ka Kynhun Myntri sorkar ba kan leh shuh shuh ia kaba donkam na ka liang ka Sorkar Jylla,” u la bynrap.

U Bah Aristotle u la ong ruh ba ka Seng kan ym don da kiwei pat ki lad ki lynti jong ka jingiakhih ba tyngeh katkum ka lynti synshar paidbah lada na ka liang ka Sorkar kam pynsngap ia kane ka jingdawa ka jong ki.  

U la ong ruh ba ia kane ka mat la iakren ha ka jingialang kaba la long ha ka 2 tarik Risaw da kaba pynshong nongrim halor ka rai ba la shim ha ka General Executive Council (GEC) kaba la long ha ka 21 tarik u Nailur ba la dep hadien ba la ioh jingtip na ki heh ka Tnad pule puthi halor ka jingthmu jong ka sorkar Jylla ban kynthup ia ki nonghikai SSA kum ki nongtrei sorkar.       

“Ngi la shim ruh ia ka rai ban phah ia ka jingshim rai ka jong ngi lyngba katei ka jingialang jong ka GEC,” bynrap u president.