Ar bnai pan por ka HPC ban bujli president bad pyniaid ia ka jingiakren halor ka Them Metor

Syllad | The Rising MeghalayaJune 4, 2024

Ka Harijan Panchayat Committee (HPC) ka la pan por na ka sorkar ar bnai na ka bynta ban thung ia u president uba thymmai u ban pyniaid shakhmat ia ka jingiakren bad ka sorkar Jylla ha kaba iadei bad ka jingpynkhreh ban pynkynriah ia ki 342 tylli ki longiing napoh Them Metor na Them Iew Mawlong.

Kane ka la wan long saw sngi shwa ka jingialang kaba kongsan ba la buh ban pynlong hapdeng ka sorkarJyll bad ka HPC na ka bynta ban shim ia ka rai kaba khatduh halor kane ka bynta.

Ha ka shithi sha u Symbud Myntri Rangbah ka Jylla uba khmih ia ka Tnat kam pohiing (Police) u Bah Prestone Tynsong ha ka 31 tarik u Jymmang 2024, u Secretary ka HPC u Gurjit Singh u la ong, “Nga la thoh ban buh ka jingkyrpad ban pynsangeh shwa ia kane ka jingialang ka ba la pynbeit ban pynlong ha ka 7 tarik Jylliew ha kaba iadei bad ka jaka shong ka jong ngi hapoh Harijan Colony, Bara Bazar, Shillong.”

“Ka long kaba sngewsih ban pyntip sha phi ba u Rangbah Shnong / President jong ngi u Billu Singh u la khlad noh dang shen. Hapdeng ka jingsngewsih, mynta ngi dang ia pynbeit bad kiba haiing hasem na ka bynta ka jingleh niam ba khaduh katkum ka rukom lehniam jong ki Singh hapoh ka iingsah jong u ha Shillong kumjuh hapoh ka shnong ka jong u ha Punjab,” u la ong.

Hadien u Singh u la ong ba kin dang pyndep ia ka jingjied ia u Rangbah Shnong / president bathymmai jong ka Harijan Panchayat Committee bad ban rejister ia ka committee kaba thymmai ha kaophis jong u Registrar of Society.

“Kane ka jingpynkhamti kam ka dei kaba kongsan hapdeng ki nongshong shnong ki jong ngi ha ka kam synshar khdar bad ha ki kam shim rai kaba long katkum ki kyndon treikam jong ka HPC cum headmanship. Kan shim por ia ngi kumba ar bnai ban pyndep ia kane ka kam ban wad ia u briew uba biang u ban mih bujli ha ka jaka jong une u nongialam ba la rim uba la khlad noh bad uba la shari ia ka seng bad ia ki paidbah nongshong shnong ka jong ngi mynta la bun bun snem,” u la bynrap.

“Ban pyndep ia kane ka sienjam bad ban pynthikna ba u nongialam bathymmai jong ngi un long uba la pynkhreh bha ban iashim bynta ha ki jingiamir jingmut bad ka sorkar, ngi donkam katto katne ka por. Ngi pyrto ia ka jingsngewthuh ka jon phi ha kaba kum kane ka khep kaba shem jingeh,” ong shuh shuh u Singh ha ka shithi.